Matur | mbl | 6.7.2024 | 6:30

Sítrónukakan frá ástríðubakaranum í Móberginu

Dýrleg sneið af sítrónuostakökunni hennar Brynju Döddu. Ljósmynd/Brynja Dadda Sverrisdóttir

Þá er komið að helgarbakstrinum sem er ómissandi hér á matarvefnum og nýtur mikilla vinsælda. Nú töfrar Brynja Dadda Sverrisdóttir, ástríðubakari í Móberginu í Kjós, fram dýrlega sítrónuostaköku sem er sáraeinfalt að gera og allir ráða við. Þessa þarf að gera daginn áður en það á að bera hana fram. Spurning um að drífa í því að gera þessa og eiga með sunnudagskaffinu.

Sítrónuostakaka ástríðubakarans

Botn

1 pk. engiferkex mulið niður
80 g smjör, brætt (kexið getur verið svolítið misjafnt og því má bæta við smjöri ef það er mjög þurrt)
Blandað saman og þrýstið í mót í meðalstærð

Fylling

1 pk. sítrónuhlaup, leyst vel upp í einum bolla af sjóðandi vatni og síðan kælt
400 g rjómaostur
1 tsk. vanilludropar
½ bolli sykur
1 og ½ dl rjómi, þeyttur

Aðferð:

Hrærið saman rjómaosti, sykri og vanilludropum.
Bætið hlaupinu varlega saman við í mjórri bunu ef það er enn þá hiti í því.
Setjið að lokum þeytta rjómann saman við.
Kælið, þarf helst nokkra tíma í kælingu og þannig er best að gera þessa með dags fyrirvara.
Berið fram þegar tilefni er til og njótið.