Ofnbökuð bleikja í raspi með bökuðum aspas, steiktum kartöflum og kaldri sósu

Ofnbökuð bleikja og aspas

Fyrir 5-6

• 900 g bleikjuflök (3 stk.)
• 1 búnt ferskur aspas
• 130 g brauðrasp
• 60 g rifinn Goðdala Reykir ostur
• 1 msk. saxað timian
• 1 msk. söxuð steinselja
• 2 stk. rifnir hvítlauksgeirar
• 100 g brætt smjör
• Olía, salt og pipar eftir smekk
• Sítrónubátar eftir smekk

Aðferð:

1. Penslið bæði bleikjuflökin og aspasinn með ólífuolíu, saltið, piprið og leggið á bökunarpappír í ofnskúffu (Berglind notaði tvær skúffur, aðra fyrir fisk og hina fyrir aspas).
2. Hitið ofninn í 200°C og útbúið brauðraspinn á meðan.
3. Blandið brauðrasp, rifnum osti, kryddum, hvítlauk og bræddu smjöri saman í skál með höndunum þar til brauðraspurinn hefur drukkið í sig smjörið.
4. Skiptið blöndunni þá jafnt yfir bleikjuflökin og restinni yfir aspasinn.
5. Spreyið með matarolíuspreyi og bakið í heitum ofninum í um 15-20 mínútur.

Kartöflur

• 3 stk. stórar bökunarkartöflur
• salt, pipar, hvítlauksduft, timian eftir smekk
• Ólífuolía eftir smekk

Aðferð:

1. Flysjið kartöflurnar og skerið í litla teninga (um 1 x 1 sm).
2. Steikið þær upp úr vel af olíu á meðalheitri pönnu í um 30 mínútur eða þar til þær eru mjúkar í gegn.
3. Gott að krydda þær til eftir smekk og snúa reglulega til að þær festist ekki við pönnuna, bætið við olíu ef þurfa þykir.

Köld sósa

• 180 g 18% sýrður rjómi
• Safi úr ½ límónu
• 2 msk. saxaður kóríander
• 1 stk. rifið hvítlauksrif

Aðferð:

1. Setjið allt hráefnið saman í skál og hrærið vel saman.
2. Berið fram með bleikjunni og aspasinum.