Matur | Veitingastaðir | mbl | 20.7.2024 | 16:30

Ástríðukokkar bjóða upp á smassborgara á Götubitahátíðinni

Andreas Peterson með smashborgarann sem er sérstaðan hjá 2Guys. mbl.is/Arnþór Birkisson

Um helgina fer fram stærsti matarviðburður á Íslandi en hann hófst í gær, föstudag, í Hljómskálagarðinum í hjarta borgarinnar og stendur fram á sunnudag. Mikið er um dýrðir og keppt verður um titilinn Besti götubiti Íslands 2024. Alls eru um 30 matarvagnar sem taka þátt og bjóða upp á fjölbreytt úrval af kræsingum og allir ættu að finna eitthvað við sitt hæfi. Meðal matarvagnana sem þar eru að finna er 2Guys vagninn sem býður upp á alvöru smassborgara sem gerðir eru frá grunni.

Frétt af mbl.is

30 matarvagnar og sölubásar á Götubitahátíð

Hjalti Vignis og Andreas Petersson eru mennirnir á bak við 2Guys. „Konurnar okkar fá svo mikið hrós fyrir að þola okkur og okkar vinnutíma, þannig kannski má segja að þær séu megin ástæða þess að 2Guys sé til. Við erum hvorugir lærðir kokkar en erum ástríðukokkar af lífi og sál og það er það sem 2Guys snýst um, ástríða á hamborgurum,“ segir Hjalti.

Að vera í vagninum er það skemmtilegasta í lífinu

Segðu okkur aðeins frá til matarvagnarins, tilurðina bak við hann

„Frá því ég sá myndina Chef með Jean Favreau árið 2014 vissi ég að ég yrði að vera með matarvagn einhvern tímann á lífsleiðinni. Eftir að við stofnuðum 2Guys var alveg ljóst að vinsældirnar voru þannig að við urðum að fá okkur matarvagn til að komast nær fólkinu og létum vaða í vagn í byrjun árs, árið 2023. Eftir fyrsta sumarið var alveg ljóst að vagninn var of lítill svo við ákváðum að láta smíða fyrir okkur nýjan og stærri vagn erlendis og fengum hann afhentan í vor. Að vera í vagninum er það skemmtilegasta sem ég geri í lífinu og ég hefði ekki getað hugsað mér betri stað en að verja fertugsafmælisdeginum í byrjun júlí en í vagninum á Lopapeysunni á Akranesi,“ segir Hjalti og brosir allan hringinn.

Er þetta í fyrsta skiptið sem þið takið þátt í Götubitahátíðinni?

„Nei, við tókum þátt í fyrra líka og þvílíka veislan sem það var. Þessi hátíð er orðin órjúfanlegur þáttur í matarmenningunni á Íslandi og sést það bara á því hversu gríðarlega margir taka þátt og fjölbreytnin er gríðarleg.“

Hvar geta þeir sem elska götubita helst fundið ykkur og vagninn?

„Við höfum verið þéttbókaðir frá byrjun sumars en erum ekki með hann staðsettan á sama stað allt sumarið, til þess höfum við þrjá 2Guys staði á Laugavegi, Ægisíðu og Gnoðarvogi. Við mætum á allar helstu bæjarhátíðir landsins á sumrin og tökum við bókunum í allskonar veislur eins og brúðkaup og hópefli svo fátt sé nefnt.“

Smassborgarinn lítur ekkert smá vel út. mbl.is/Arnþór Birkisson

Einfaldleikinn og stöðugleikinn er lykillinn

Segðu okkur aðeins frá sérstöðunni sem smassborgarnir hafa

„Einfaldleiki og stöðugleiki er klárlega lykillinn og sérstaðan okkar felst einfaldlega í því að bjóða upp á albesta smassborgara sem völ er á hverju sinni. Þeir eru gerðir úr 100% hreinu nautahakki án allra auka- og bindiefna. Allar okkar uppskriftir, hvort sem um ræðir sósur eða samsetningar eru unnar innanhúss og í samstarfi við starfsfólkið okkar sem er stóri parturinn af sérstöðunni okkar. Þau vita að allt minna en fullkomið er ekki nægilega gott og eru stolt af því að eiga þátt í því að við höfum núna tvö ár í röð verið valin besti borgarinn í Reykjavík af Reykjavik Grapevine.“

Frétt af mbl.is

2Guys á tveimur nýjum stöðum

Njóta hamborgarnir mikilla vinsælda?

„Gríðarlegra, í upphafi vorum við í 60 fermetra rými en erum nú með, eins og áður sagði, þrjá starfandi 2Guys staði þannig það er alveg ljóst að það vantaði smassborgara á Íslandi sem gefa mörgum af bestu smassborgarastöðum í heiminum ekkert eftir og við fáum mjög reglulega að heyra það frá erlendum gestum sem er gríðarlega stór prósenta af viðskiptavinum okkar á Laugavegi,“ segir Andreas að lokum enda allt komið á fullt á Götubitahátíðinni.