Matur | mbl | 6.8.2024 | 10:52

Löðrandi salthnetuspaghettí með heimagerðu pestói

Salthnetupestó er sérlega ljúffengt og gott. Unsplash/Getty Images

Eftir Verslunarmannahelgi þar sem tíðkast að gera vel við sig í mat og drykk er gott að leita aftur í einfaldleikann. Einfaldleikinn þarf þó ekki að vera óspennandi og goslaus. Hann getur verið alveg löðrandi eins og þessi réttur sannar. Hér er á ferð spaghettí með heimagerðu salthnetupestói sem bráðnar í munni og færir þennan mánudagsþriðjudag upp á annað plan. Gott er að strá svolitlum parmesanosti yfir pestóið þegar það er komið á diskinn.

Spaghettí með salthnetupestói bráðnar í munninum. Unsplash/Alice Pasqual

Salthnetupestó (uppskrift fyrir 4)

1/2 bolli salthnetur
2 msk. ferskur sítrónusafi
1 lífrænt hvítlauksrif
2 bollar af ferskri basilíku
1/2 bolli lífræn ólífuolía
1/2 bolli niðurrifinn parmesanostur

Aðferð:

Allt sett í blandara og þeytt saman þangað til pestóið er orðið silkimjúkt.
Spaghettí soðið eftir leiðbeiningum á pakka.
Þegar spaghettíið er tilbúið er öllu blandað saman í stóra skál. Ef það er afgangur má taka restina með sér í nesti daginn eftir. Svona spaghettí er jafngott heitt og kalt.