Matur | mbl | 15.8.2024 | 14:10

Ómótstæðilega góðir ofnbakaðir þorskhnakkar í osta- og pestósósu

Ofnbakaðir þorskhnakkar í osta- og pestósósu með ferskum sprettum. Ljósmynd/Sjöfn

Ég bauð fjölskyldunni upp á þennan ljúffenga fiskrétt í vikunni og einfalt meðlæti sem tekur stutta stund að framreiða. Hér eru á ferðinni ofnbakaðir þorskhnakkar í osta- og pestósósu sem bragðast ómótstæðilega vel saman. Með þessu bauð ég upp á ferskt salat og soðin hrísgrjón. Það má líka sjóða nýtt smælki, kartöflur og hafa með. Nú er uppskerutími og nýjar kartöflur komnar í verslanir sem passa fullkomlega þessum fiskrétt.

Ómótstæðilega góður fiskréttur sem bragðast afar vel með fersku salati og hrísgrjónum. Ljósmynd/Sjöfn

Ofnbakaðir þorskhnakkar í osta- og pestósósu

Fyrir 4

1 kg þorskhnakkar
1 stk. piparostur
250 ml rjómi
1 lítil krukka rautt pestó
1 msk. sýrður rjómi
2-3 msk. rjómaostur
Grænmetiskrydd frá Mabrúka eftir smekk
Pipar og salt eftir smekk
Ólífuolía eftir smekk
1 lúka ferskar sprettur, fæ mínar hjá VAXA
Rifinn mozzarellaostur eftir smekk

Aðferð:

Byrjið á því að hita ofninn í 180°C hita.
Skerið fiskinn í jafnstóra bita.
Finnið til meðalstórt eldfast mót.
Setjið örlítið af ólífuolíu í fatið.
Leggið fiskinn í eldfast mót og kryddið eftir smekk með kryddunum.
Skerið piparostinn í teninga og setjið í pott ásamt rjómanum bræðið þar til osturinn hefur leyst upp.
Bætið þá við pestóinu, sýrða rjómanum og rjómaostinum út í.
Þegar ostablandan er orðin nokkuð góð og blandast vel við pestóið er lag að taka pottinn af hellunni og taka næsta skref
Hellið sósunni yfir fiskinn og dreifið rifnum mozzarellaosti yfir.
Setjið eldfasta mótið með fisknum í ostablöndunni inn í ofn og bakið í um það bil 20 til 25 mínútur eða þar til mozzarellaosturinn er aðeins farinn að brúnast.
Dreifið ferskum sprettum yfir réttinn þegar hann kemur úr ofninum
Berið fram með fersku salati að eigin val og hrísgrjónum, líka afar gott að bera fram nýjar soðnar kartöflur. Smælki passar sérstaklega vel með þessum fiskrétti.