Matur | mbl | 28.8.2024 | 18:00

Syndsamlega góð espresso martini ostakaka

Syndsamlega góð espresso martini ostakaka sem er líka svo falleg í glasi. Ljósmynd/Berglind Hreiiðarsdóttir

Einn vinsælasti kokteillinn sem sögur fara af í dag er espresso martini. Hér er komin syndsamlega góð espresso martini ostakaka sem á pottþétt eftir að njóta vinsælda hjá espresso martini aðdáendum líka. Berglind Hreiðars hjá Gotterí og gersemar töfraði þessa fram á dögunum og hún sló í gegn. Hægt er að sjá Berglindi útbúa þessa girnilegu ostaköku á Instagram síðunni hennar hér. Þessi er líka svo fallega borin fram, mikið augnakonfekt að njóta.

View this post on Instagram

A post shared by Gotterí og gersemar (@gotterioggersemar)

Espresso martini ostakaka

Fyrir 6 - passar í 6 hanastélsglös

12 stk. Oreo kexkökur
40 g brætt smjör
500 g rjómaostur við stofuhita
160 g sykur
1 msk. kakóduft + meira til skrauts
2 tsk. vanillusykur
50 ml sterkt uppáhellt kaffi við stofuhita
100 g suðusúkkulaði brætt
300 ml þeyttur rjómi
Kaffibaunir til skrauts

Aðferð:

Byrjið á því að mylja kexið í matvinnsluvél og hræra síðan smjörinu saman við og skiptið niður í botninn á glösunum.
Stífþeytið rjómann og leggið til hliðar.
Þeytið næst rjómaost, sykur, kakóduft og vanillusykur saman stutta stund.
Blandið þá uppáhelltu kaffi og bræddu súkkulaði saman við og skafið vel niður á milli.
Þegar rjómaostablandan er orðin slétt og jöfn má vefja þeytta rjómanum saman við hana með sleikju.
Skiptið ostakökublöndunni á milli glasanna og sléttið úr.
Gott er að kæla ostakökuna í að minnsta kosti 3 klukkustundir (eða yfir nótt) og sigta síðan kakóduft yfir og skreyta hvert glas með þremur kaffibaunum.
Berið fram og njótið í góðum félagsskap við kertaljós.