Matur | mbl | 30.8.2024 | 18:10

Föstudagspítsan: Fjögurra ostapítsan hans Jóa Fel

Jóhannes Felixson, alla jafna kallaður Jói Fel býður upp á föstudagspítsuna sem er alíslensk að þessu sinni, fjögurra ostapítsa sem bráðnar í munni. mbl.is/Arnþór

Heiðurinn af föstudagspítsunni að þessu sinni á Jóhannes Felixson, alla jafna kallaður Jói Fel, bakari með meiru. Hann er nýbúinn að gefa út eilífðarmatreiðslubók sem ber heitið Eldabaka.is og á eftir að fjalla frekar um hér Matarvefnum. Ástríða Jóa er meðal annars að baka pítsu og leika sér með ný hráefni ofan á pítsuna. Jói býður hér upp á alíslenska fjögurra ostapítsu en allt hráefnið ofan á pítsuna er íslenskt. Ostarnir eru ómótstæðilega góðir þegar þeir hafa bráðna saman á þennan syndsamlega hátt. Hægt er að sjá aðferðina við pítsubaksturinn hans Jóa frá grunni á nýju síðunni hans hér sem hefur að geymaeilífðarmatreiðslubókina góðu.

Pítsan hans Jóa Fel er hin girnilegasta og ostarnir eru ómótstæðilegar góðir þegar þeir eru búnir að bráðna saman og mynda þessa ostablöndu. Ljósmynd/Jói Fel

Fjögurra ostapítsan hans Jóa Fel

Pítsadeig

4 stk - Tekur sólarhring að útbúa þetta pítsadeig

600 g hveiti
400 ml vatn
20 g salt
1 g þurrger

Aðferð:

Leysið upp gerið í vatninu.
Blandið hveitinu rólega saman við á meðan verið er að vinna deigið, vinna í um það bil 5 mínútur rólega.
Látið deigið standa í um það bil 15 mínútur. S
Setjið síðan salt saman við og vinnið saman í öðrum gír í 8 mínútur.
Látið síðan deigið standa í um það bil 3 klukkustundir, veltið því tvisvar á meðan meðan það stendur.
Gerið síðan 4 kúlur úr deiginu og láta kúlurnar standa í 1 klukkustund við stofuhita.
Setjið þær síðan inn í kæli í um það 15-18 klukkustundir.
Takið út og látið standa á borðið við stofuhita í um það bil 1-2 klukkustundir áður en þið bakið.
Fletjið út hverja kúlu út með höndunum og útbúið botna.
Næsta skref er að setja hráefnið sem á að fara ofan á botnana fyrir bakstur, sjá lista fyrir neðan.

Ofan á pítsuna fyrir bakstur

Magn eftir smekk

Íslenskir kirsuberjatómatar, maukaðir með salti og smá olíu
Íslenskur ferskur mozzarellaostur
Íslenskur gráðostur að eigin vali
Íslenskur Feykir
Íslenskur rjómaostur
Íslensk eldpipar

Aðferð:

Setjið hráefnið ofan á pítsuna eins og ykkur langar að hafa það.
Bakið pítsuna annaðhvort í úti-pítsaofni eða í bakarofni á háum hita.
Fylgjist með bakstrinum og takið út þegar osturinn farinn að bráðna og pítsubotninn farinn að taka á sig lit.

Ofan á pítsu eftir bakstur

Magn eftir smekk