Ostaslaufur með pestó

Einfalt gerdeig

• 1 kg brauðhveiti
• 1 bréf þurrger (11 g)
• 3 msk. hrásykur
• 1 msk. salt
• ½ dl góð matarolía
• 300 ml heitt vatn
• 300 ml mjólk
• Grænkálspestó, sjá uppskrift fyrir neðan
• Rifinn ostur

Aðferð:

1. Setjið allt hráefnið saman í hrærivélaskál og hnoðið í hrærivél með króknum þar til deigið er þétt og laust frá hliðum skálar.
2. Berið örlitla matarolíu innan í stórri skál, setjið deigið þar ofan í og stykki yfir.
3. Látið hefast á þurrum, hlýjum stað í að minnsta kosti eina klukkustund.
4. Skiptið þá deiginu í þrjá hluta.
5. Takið einn hluta og fletjið út í ferning, helmingi lengri á langhliðina, um það bil 45x30 cm
6. Smyrjið gott grænt pestó á langhliðina, helminginn, stráið rifnum osti yfir og setjið hinn helminginn yfir, þrýstið vel.
7. Pestó er einfalt að búa til og uppskrift fylgir með hér fyrir neðan en þið getið líka bara keypt gott pestó.
8. Skerið í lengjur um það bil 2 sentimetra breiðar, takið hverja lengju upp og snúið upp á hana og leggið síðan á bökunarpappír á plötu.
9. Látið hefast aðeins aftur. Leggið stykki yfir og geymið í 20 til 30 mínútur.
10. Hitið bakaraofninn í 200°C hita meðan lengjurnar hefast.
11. Penslið síðan lengjurnar með þeyttu eggi og stráið örlitlu salti yfir eða öðru góðu kryddi.
12.  Setjið síðan plötuna með lengjunum á og setjið inn í 200°C heitan ofn og bakið í 10 mínútur (ofnar eru misjafnir) gott að fylgjast vel með bakstrinum.
13. Takið lengjurnar út þegar fallegur gylltur litur er kominn á þær og dásamlegur ilmur í húsið.
14. Gerið eins við hina tvo hluta deigsins, ef þið viljið gera brauðstangir úr öllu saman, en það er líka sniðugt að gera t.d. fléttubrauð, skinkuhorn,  kanilsnúða eða bollur úr restinni.
15. Bollubrauð gerir Brynja Dadda oft og setur þá bollur í eldfast fat og leyfir þeim að hefast vel en þær þurfa um það bil 18 mínútur í ofni.
16. Úr einu kílói af hveiti kemur ágætis stafli, það er fínt að eiga í frystinum ljúfmeti eins þessi brauð og taka út og hita þegar góða gesti ber að garði.

Grænkálsspestó

• 4-5 blöð af grænkáli, notið ekki stilkinn
• 100 g kasjúhnetur
• 2 hvítlauksrif (smekksatriði)
• Parmesanostur (góður biti en líka smekksatriði)
• Nokkur blöð af basilíku
• Salt og pipar eftir smekk
• Góð olía

Aðferð:

1. Allt sett saman í matvinnsluvél og maukað vel.
2. Smakkið til.
3. Geymið í lokaðri krukku í kæli fyrir notkun.