Uppáhaldsbúðingur Mörtu Maríu í Húsó
Setja bókamerki
Fastur liður á laugardagsmorgnum á matarvefnum eru leyndardómsfullu uppskriftirnar úr Húsóeldhúsinu í Hússtjórnarskólanum sem njóta mikilla vinsælda hjá lesendum matarvefsins.
Að þessu sinni deilir Marta María Arnarsdóttir skólameistari Hússtjórnarskólans með lesendum uppskrift að súkkulaðibúðing að hætti Húsó. Það má líka kalla þetta matarlímsbúðing ef vill en það er miklu auðveldara að gera þennan en ykkur grunar.
„Þetta er uppáhaldsbúðingurinn minn, ég er svo mikill súkkulaðiunnandi,“ segir Marta María með bros á vör.
„Það eru margir sem hræðast það að vinna með matarlím. En þegar rétt er farið að og öllum skrefum er fylgt samviskusamlega er lítið mál að gera dýrindis matarlímsbúðing. Í matargerð er auðvelt að breyta uppskriftum og gera „dass” af þessu og hinu eftir eigin hentisemi. Það gengur ekki svo auðveldlega upp þegar unnið er með matarlím enda getur maður þá endað með kekkjóttan búðing og það viljum við ekki. Það þarf að beita þolinmæði og bera virðingu fyrir ferlinu, þá mun allt ganga smurt,“ segir Marta María.
Nú er bara að bretta upp ermar og prófa.
Súkkulaðibúðingur að hætti Húsó
- 4 blöð matarlím (8 gr.)
- 2 egg
- 35 g sykur
- 50 g rifið eða saxað súkkulaði
- 1 tsk. kakó
- 2 dl rjómi
Aðferð:
- Byrjið á því að rífa eða saxa súkkulaðið.
- Leggið matarlímsblöðin í bleyti í ískalt vatn.
- Þeytið rjómann.
- Sigtið kakóið út í og þeytið með rjómanum í restina. Setjið í skál og geymið í kæli.
- Þvoið hrærivélaskálina og þeytarann vel og þurrkið.
- Þeytið eggin og sykurinn létt og ljóst í hreinni skálinni.
- Hellið vatninu af matarlíminu og bræðið yfir vatnsbaði eðaí örbylgjuofni.
- Kælið með 1 msk. af vatni í 37°C.
- Hellið í mjórri bunu út í eggjahræruna, hrærið í meðsleikju, alltaf frá botninum fram og til baka, ekki í hringi.
- Blandið rjómanum og súkkulaðinu saman við.
- Berið fram í fallegri skál, skreytið endilega með rjóma og söxuðu súkkulaði.
- Gott er að bera súkkulaðibúðinginn fram með ferskum ávöxtum.
Andlát hjóna í Neskaupstað: Áfram í gæsluvarðhaldi
Stimplum stráka ólæsa og uppnefnum þá í sömu andrá
Stórbættur árangur barna
Nemendur læra af eldra fólki
„Fyrst til skoðunar þegar bærinn verður orðinn öruggur“
Úrlausnir á næstu dögum
„Þetta eru miklu grófari mál“