Matur | mbl | 18.9.2024 | 18:00

Eðal hrákaka Önnu Eiríks

Þetta er hrákakan sem er í mestu uppáhaldi hjá Önnu Eiríks. Ljósmynd/Aðsend

Þessi hrákaka er ótrúlega einföld og fljótleg að búa til, það eina sem þarf er matvinnsluvél eða góður blandari. Uppskriftin kemur úr smiðju Önnu Eiríks deildarstjóra í Hreyfingu en Anna heldur einnig úti heilsuvef þar sem hún býður upp á fjarþjálfun, hollustu uppskriftir og fleira áhugavert. Sjá nánar hér.

Þessi hrákaka er í miklu uppáhaldi hjá henni og er oftar en ekki til í frystinum.

„Mér finnst æðislegt að eiga þessa köku inn í frysti til að gæða mér á þegar sætindaþörfin hellist yfir,“ segir Anna og hvetur lesendur Matarvefsins til að prófa.

Eðal hrákaka Önnu Eiríks

Botn

100 g möndlur, lítill poki
150 g saxaðar döðlur
2 msk. kakó

Krem

1 lárpera
1 banani
3 msk. fljótandi kókosolía
3 msk. Agave síróp
½ tsk. vanilludropar

Toppurinn

100-150 g dökkt súkkulaði

Aðferð:

Byrjið á botninum og setjið fyrst saxaðar döðlur í bleyti.
Hellið möndlunum í matvinnsluvél og saxið.
Blandið kakóduftinu saman við og hellið svo vatninu af döðlunum og bætið þeim við.
Hrærið allt vel saman og setjið í form.
Gott er að setja bökunarpappír undir ef þið viljið geta tekið hrákökuna upp úr forminu í heilu lagi til að skera í litla bita.
Setjið síðan öll innihaldsefnin sem þarf í kremið í matvinnsluvélina og þeytið vel saman.
Hellið síðan yfir botninn.
Bræðið súkkulaðið við vægan hita og hellið því síðan yfir kremið.
Setjið síðan kökuna í frysti og geymið þar.
Gott er að taka hana út aðeins áður en hún er borin fram en hún er líka góð mjög köld eða hálf frosin.