Matur | mbl | 29.9.2024 | 12:00

Frumlegasta fiskisúpan með rófum og chili

Ein frumlegasta haustsúpan með fisk, rófum og chili. Ljósmynd/Helga Mogensen

Haustið kallar á matarmikla súpu með nýuppteknu grænmeti. Hér er á ferð ein frumlegasta haustsúpa sem fyrirfinnst - fiskisúpa með rófum og chili. Uppskriftin er sterk og rífur í.

Hún kemur frá Helgu Mogensen, sem ekki bara matgæðingur heldur sérfræðingur í grænmetisréttum. Uppskriftina útbjó hún fyrir uppskriftarvef Sölufélags garðyrkjubænda.

Þessi kemur á óvart og mér hefði aldrei dottið í hug að setja rófur í fiskisúpu.

Fiskisúpa með rófum og chili

400 g fiskur, þorskur
500 ml fisksoð
Gróft salt eftir smekk
Hvítur pipar eftir smekk
Chiliduft á hnífsoddi
1 tsk. karrí
1 stk. hvítlaukur, saxaður smátt eða marinn
2 stk. laukar, skorinn smátt
3 stk. rófur
1 msk. dill
1 msk. fersk steinselja, söxuð
Vorlaukur, eftir smekk
2 stk. lárviðarlauf

Aðferð:

Hægt að kaupa tilbúinn fljótandi fiskkraft í verslunum. Hlutföll um það bil 5 msk. í 1 l eða fiskkraft teninga og sjóða í vatni.
Byrjið á því að mýkja laukinn og hvítlaukinn í ólífuolíu ásamt smá salti.
Hrærið kryddum saman við áður en fiskisoðinu og vatni er bætt út í.
Skrælið rófurnar og skerið í litla bita og bætið saman við og látið sjóða í 15 mínútur eða þar til þær eru orðnar meyrar.
Lækkið undir og þeytið súpuna gróflega með töfrasprota eða í matvinnsluvél.
Mögulega þarf að bragðbæta súpuna ásamt því að setja örlítið af sítrónusafa til að draga fram ferskleika hennar.
Skerið fiskinn í smáa bita og setjið út í sjóðandi heita súpuna rétt undir lokin ásamt smátt söxuðu dilli og steinselju.
Berið fram með því sem hugurinn girnist, til dæmis með nýbökuðu brauði og þeyttu smjöri.