Matur | mbl | 13.10.2024 | 6:30

Geggjuð og ekta uppskrift að Pad-Thai núðlum

Sonya segir dagsdaglegu matseldina byggjast að mestu leyti á því sem hún ólst upp við sjálf og að taílensk matargerð sé list. Ljósmynd/Aðsend

Sonya Sonpanya segir dagsdaglegu matseldina byggjast að mestu leyti á því sem hún ólst upp við sjálf og að taílensk matargerð sé list. Frekar sé eldað eftir eigin smekk og hugmyndum heldur en að fylgja uppskrift.

Sonya starfar sem sjúkraliði á kvenlækningadeild Landspítalans. Hún er frá Khon Kaen á Taílandi en flutti hingað til lands 19 ára gömul. Hún starfrækir einnig eigin nuddstofu í Mosfellsbæ ásamt því ala upp tvo fjöruga drengi.

Það er tilvalið og ekkert of flókið að matreiða ekta taílenskar Pad Thai-núðlur Ljósmynd/Aðsend

Það hefur verið vinsælt að halda matarkvöld með samstarfsfélögum hennar á kvenlækningadeild og hefur hún kennt þeim að elda ekta taílenskan mat.

Eldað að hætti Sonyu. Ljósmynd/Aðsend

Sonya deilir hér uppskrift og upplifun frá einu slíku kvöldi þar sem eldaðar voru Pad Thai-núðlur.

Geggjuð og ekta uppskrift að Pad-Thai núðlum

Pad Thai-núðlur

fyrir tvo

Olía til steikingar
200 g hrísgrjónanúðlur
1-2 kjúklingabringur
2 skarlottlaukar
Sirka 2 lúkur blaðlaukur
Sirka 1 lúka baunaspírur
Pad Thai-sósa
Fiskisósa
Sykur
Chiliduft
Salthnetur
Límóna

Aðferð:

Gott er að byrja á að leggja 200 grömm af hrísgrjónanúðlum í volgt vatn í um 20 mínútur. Vatnið er svo sigtað frá.
Því næst eru 1-2 kjúklingabringur (eftir smekk) skornar í bita og steiktar í gegn á pönnu. Einnig er hægt að nota t.d. tófú eða rækjur í stað kjúklings.
Olía er sett á pönnu og hituð. Fínt saxaður skarlottlaukur settur út í. Því næst er fjórum skeiðum af padthai bætt út á pönnuna (fæst t.d. í fiska.is).
Kjúklingnum er bætt út á pönnuna ásamt tveimur eggjum. Þá er núðlunum bætt út á pönnuna. Öllu blandað vel saman.
Blaðlaukur (sirka tvær lúkur) er skorinn í strimla og bætt út á pönnuna.
Baunaspírum (sirka einni lúku) er bætt út á pönnuna.
Þá er fiskisósu, sykri og chilidufti bætt út á pönnuna, eftir smekk. Gott að smakka til.
Rétturinn er skreyttur með fíntsöxuðum salthnetum, baunaspírum og límónu.

Verði ykkur að góðu!