Matur | mbl | 21.10.2024 | 12:00 | Uppfært 22.10.2024 10:03

Guðdómlega fallegt sólberjakonfekt með bleikri súkkulaðiskel

Eftirréttadrottningin, Ólöf Ólafsdóttir, ætlar að bjóða upp á þessa guðdómlega fallegu konfektmola með kaffinu á Bleika deginum. Samsett mynd

Eftirréttadrottningin, Ólöf Ólafsdóttir, og fyrrverandi landsliðskokkur ætlar að halda upp á Bleika daginn sem fram undan er á miðvikudaginn 23. október næstkomandi og bjóða upp á þessa dýrindis bleiku konfektmola.

Tilefni bleika dagsins er ærið en það er að allar konur sem greinst hafa með krabbamein finni fyrir stuðningi landsmanna og samstöðu.

Frétt af mbl.is

Eftirréttadrottningin töfrar fram guðdómlega ostaköku

Hér er á ferðinni guðdómlegt sólberjakonfekt með bleikri súkkulaðiskel sem bráðnar í munni. Ólöf segir að það sé alls ekki flókið að gera konfekt en galdurinn sé fyrst og fremst að flýta sér hægt og nostra við molana. Einnig er lykilatriðið að tempra súkkulaðið rétt.

Til þess að gera konfekt eins og þetta þarf að vera konfektform til staðar. Í forminu mótast konfektmolinn.

Sólberjakonfekt með bleikri súkkulaðiskel sem gleður sálina. Ljósmynd/Ólöf Ólafsdóttir

Sólberjakonfekt með bleikri súkkulaðiskel

Sólberjasulta

200 g sólberja púrra
7 g sítrónusafi
40 g corn síróp (glúkósi)
5 g pektín
60 g sykur

Aðferð:

Blandið sykri og pektíni saman og setjið til hliðar.
Vigtið það sem eftir er af hráefnunum í pott og hitið að suðu, hellið þá sykurblöndunni saman við og passið þetta stanslaust á meðan.
Hellið sultunni í skál og leyfið henni að kólna alveg.
Þegar sultan er orðin köld er hún blönduð með töfrasprota til þess að fá enn þá betri áferð.

Bleik súkkulaðiskel

1000 g hvítt súkkulaði
Bleikur fituuppleysanlegur matarlitur, mjög mikilvægt er að matarliturinn sé fituuppleysanlegur.

Aðferð:

Temprið hvítt súkkulaði í skál og blandið saman við bleika matarlitinn.
Þegar súkkulaðið er orðið bleikt hellið því þá í konfektformin til að búa til skelina.
Hellið súkkulaðinu úr eftir 30 sekúndur til að búa til fallega þunna skel.
Sprautið sultunni í formin og passið að skilja smá eftir á toppnum fyrir það sem eftir er af súkkulaðinu.
Nú hefst biðin, við viljum helst láta konfektið standa úti í 10-24 klukkutíma áður en við lokum skelinni.
Þegar þessi tími er liðinn er súkkulaðið temprað aftur og það smurt á toppinn.
Leyfið þessu að harðna og þá er konfektið tilbúið og vert að losa það úr forminu.
Berið fram og njótið hvers mola.