Matur | mbl | 21.10.2024 | 21:00

Sylvía töfraði fram þessa dásamlegu kókosköku með sítrónufyllingu

Sylvía Haukdal töfraði fram þessa dásamlegu kókosköku með sítrónufyllingu og kókoskremi í tilefni Bleika dagsins. Samsett mynd

Sylvía Haukdal ástríðubakari og sælkeri byrjuð að undirbúa sig fyrir Bleika daginn sem framundan er, miðvikudaginn 23. október næstkomandi. Hún er ætlar að bjóða upp á þessa dásamlegu kókosköku með sítrónufyllingu og bleiki liturinn verður í forgrunni.

Sylvía er þekkt fyrir sínar ljúffengu kökur og fallegu kökuskreytingar og þessa dagana blómstra hún sem aldrei fyrir í kökugerðinni hjá 17 Sortum.

Falleg bleika kakan hennar Sylvíu, mikið augnakonfekt að njóta. mbl.is/Karítas

„Ég mun baka þessa köku og bera hana fram á fallega dekkað borð þar sem bleiki liturinn verður í forgrunni. Síðan verð ég örugglega í einhverju bleiku,“ segir Sylvía með bros á vör.

Ef þið viljið hafa kremið bleikt er upplagt að setja örlítið af bleikum matarlit út í kremið og blanda saman.

Sylvía skreyti kökuna með makkarónum og perlukökuskrauti á listrænan og fallegan hátt. mbl.is/Karítas

Kókoskaka með sítrónufyllingu og kókoskremi

Kókosbotn

240 g Kornax Hveiti
50 gr kókos
2 tsk. lyftiduft
1 tsk. salt
170 g smjör
300 g sykur
1 tsk. vanilludropar
5 stk. eggjahvítur
110 ml kókosmjólk
95 ml nýmjólk
45 ml olía

Aðferð:

Byrjið á því að stilla ofninn á 175°C (viftu).
Setjið næst smjör, við stofuhita, og sykur saman í hrærivélaskál og þeytið þar blandan til verður ljós og létt.
Setjið síðan eggjahvíturnar rólega saman við, lítið í einu.
Hrærið síðan saman við blönduna 1/3 af þurrefnunum.
Hrærið síðan við 1/2 af blautefnunum, mjólk, kókosmjólk, olíu og
Vanilludropum, saman við.
Hrærið loks næsta skammti, 1/3 ,af þurrefnunum saman við.
Setjið síðan restinni af blautefnunum út í.
Setjið síðan lokum síðasta skammtinn af þurrefnunum út í.
Gott er að hræra deigið ekki of mikið en samt nóg til þess að allt sé komið saman.
Setjið síðan deigið í þrjú 15 cm stór hringform.
Setjið að lokum formin inn í ofn og bakið við 175°C hita í um það bil 20-25 mínútur.

Kókoskrem

650 g smjör
650 g flórsykur
2 tsk. vanilludropar
200 ml kókosmjólk

Aðferð:

Byrjið á því að þeyta smjörið, við stofuhita, þar til það verður ljóst og létt.
Bætið síðan flórsykrinum og vanilludropunum saman við og haldið áfram
að þeyta.
Síðan bætið þið við kókosmjólkinni, við stofuhita, saman við og þeytið í 2-3
mínútur.

Sítrónufylling

70 ml sítrónusafi
3 tsk. sítrónubörkur
75 g sykur
4 stk. eggjarauður
45 g smjör

Aðferð:

Byrjið á því að setja öll hráefnin í skál yfir vatnsbað.
Passið að hræra stanslaust í blöndunni þar til hún fer að þykkna og nær
rúmlega 70°C hita.
Sigtið þá blönduna í aðra skál og setjið í kæli.

Samsetning:

Setjið síðan kökuna saman með þunnu lagi af kremi utan um hana.
Setjið loks kökuna í kæli í smá stund áður en þið haldið er áfram að setja krem og
skreyta hana.
Skreytið eins og ykkur langar til og berið hana fram á töfrandi og bleikan hátt.
Sylvía skreytti sína köku til dæmis með bleikum makkarónum, kökuperluskrauti og öðru skemmtilegu skrauti.