Matur | mbl | 26.10.2024 | 6:30

Uppáhaldsfiskréttur skólameistarans í Húsó

Marta María Arnarsdóttir skólameistari í Hússtjórnarskólanum elskar þennan ofnbakaða fiskrétt með blaðlauk. Samsett mynd

Marta María Arnarsdóttir skólameistari Hússtjórnarskólans elskar góða fiskrétti og einn af hennar uppáhalds er þessi ljúffengi ofnbakaði fiskur með blaðlauk.

Uppskriftin kemur úr eldhúsinu í Húsó og þegar kemur að því að velja smurost í réttinn getur hver og einn valið þann sem honum þykir bestur. Það sem Mörtu Maríu finnst svo gott er blaðlaukurinn sem settur er út í réttinn og það er líka hægt að velja smurost með blaðlauk ef vill.

Þetta er góður réttur til að njóta alla daga, meira segja á sunnudagskvöldi í góðum félagsskap

Ofnbakaður fiskur með blaðlauk

800 g fiskflök, ýsa eða þorskur
2 msk. sítrónusafi
½ tsk. salt
1 tsk. sítrónupipar
250 g smurostur (papriku, sveppa eða annar)
½ dl rjómi
½ dl vatn
1 dl brauðrasp
½ saxaður blaðlaukur (má skipta út fyrir rauðlauk)
2 msk steinselja
100 g rifinn ostur
60 g brætt smjör

Aðferð:

Byrjið á því að hita ofninn í 190°C hita.
Smyrjið eldfast mót.
Gætið þess að fiskflökin séu roð- og beinhreinsuð.
Skerið fiskflökin í jafnstór stykki og raðið í formið.
Kreistið sítrónusafann yfir fiskinn ásamt salti og sítrónupipar.
Bræðið saman smurostinn og rjómann ásamt vatninu í potti við vægan hita og hrærið í þar til úr verður jöfn sósa.
Hellið blöndunni jafnt yfir fiskinn.
Blandið brauðraspinum, blaðlauknum, steinseljunni, rifna ostinum og brædda smjörinu saman í skál.
Dreifið brauðraspsblöndunni yfir fiskinn.
Bakið í ofni í um það bil 20 mínútur við 190°C.
Berið fram með grjónum eða kartöflum og góðu salati.