Matur | Morgunblaðið | 13.11.2024 | 6:30

Brauðterta falska hérans í tilefni dagsins

Frumleg og bragðgóð brauðterta sem upplagt er að útbúa og halda upp á Dag brauðtertunnar. Ljósmyndir/Karl Petersson

Dagur íslensku brauðtertunnar er í dag, miðvikudaginn 13. nóvember og þá er lag að deila með lesendum uppskrift af þessari frumlegu og bragðgóðu brauðtertu sem ber heitið Brauðterta falska hérans. Uppskriftina er að finna í Stóru brauðtertubókinni sem kom út á dögunum.

Í bókinni er fjöldi uppskrifta að bæði sígildum brauðtertum og öðrum frumlegri. „Við settum saman teymi sem stóð að framkvæmd Íslandsmótsins og það fólk er líka höfundar og hugmyndasmiðir bókarinnar,“ segir Anna Margrét Marinósdóttir bókaútgefandi hjá Sögum.

Fallegar myndir Karls Petersson matarljósmyndara prýða bókina og fá munnvatnið til að flæða. Auk Karls og Önnu Margrétar voru í teyminu Erla Hlynsdóttir blaðamaður, Friðrik V. Hraunfjörð matreiðslumeistari, Helga Gerður Magnúsdóttir grafískur hönnuður og Tómas Hermannsson, bókaútgefandi hjá Sögum.

Brauðterta falska hérans

Fyrir 8-10

6 sneiðar langskorið brauðtertubrauð
400 g soðnar kjúklingabaunir
5 dl (vegan) majónes
¼ rauðlaukur
1 dl súrar gúrkur
blaðsalat
1 sítróna
karrí
salt og pipar

Hugmynd að skreytingu

baunamauk
gulrótastrimlar
agúrkustrimlar
rifnar gulrætur
salatblöð

Aðferð:

Maukið kjúklingabaunir og setjið í skál.
Saxið rauðlauk og súrar gúrkur og bætið út í skálina.
Hrærið 2-3 dl majónes saman við eftir smekk.
Smakkið maukið til með karríi, sítrónusafa, salti og pipar.
Takið smá mauk frá fyrir skraut eftir smekk. Skerið skorpurnar af brauðlengjunum.
Leggið eina lengju á bakka og smyrjið þriðjungi af maukinu yfir.
Leggið aðra brauðlengjuna þar ofan á, smyrjið vel með majónesi og raðið salatblöðum yfir.
Smyrjið þriðju lengjuna með majónesi og leggið hana með majóneshliðina niður ofan á salatblöðin.
Smyrjið þriðjungi af mauki ofan á lengjuna.
Endurtakið það sem gert var við aðra og þriðju lengjuna. Leggið loks sjöttu brauðlengjuna efst.
Gott er að geyma tertuna í ísskáp yfir nótt og skreyta næsta dag.
Smyrjið tertuna með majónesi.
Skreytið af hjartans lyst.