Í gær var Dagur íslensku brauðtertunnar haldinn með hátíðlegu yfirbragði í Hússtjórnarskólanum í Reykjavík. Sögur útgáfa fögnuðu formlegri útgáfu Stóru brauðtertubókarinnar í tilefni dagsins auk þess að úrslit Íslandsmótsins í brauðtertugerð voru kunngjörð með glæsibrag.

Mikill fjöldi brauðtertuunnenda var saman komin í Hússtjórnarskólanum í tilefni þessa og nemendur skólans göldruðu fram dýrindis brauðtertur undir leiðsögn Friðriks V matreiðslumanns sem einnig var yfirkokkur við gerð brauðtertubókarinnar.

Meðfram vinnslu þessara bókar var haldið vel heppnað Íslandsmót í brauðtertugerð og var því sannarlega tilefni til að tilkynna hverjir það voru sem stóðu upp í þessari þjóðlegu listgrein.

Erla Hlynsdóttir, ein dómnefndarmanna, formaður og stofnandi Brauðtertufélags Erlu og Erlu, kynnti úrslitin við mikinn fögnuð viðstaddra.

Verðlaun veitt í fimm flokkum

Veitt voru verðlaun í fimm flokkum, fyrir fallegustu brauðtertuna, frumlegustu brauðtertuna, bragðbestu brauðtertuna, bestu pörunina með kampavíni og loks voru Íslandsmeistarnir krýndir.

• Íslandsmeistarinn í brauðtertugerð, það eru þau Guðmundur Kristinsson og tengdamóðir hans Svala Sveinbergsdóttir sem gerðu dásamlega fallega, bragðgóða og haganlega skreytta rækjutertu. (Brauðterta purpurarósarinnar)
• Fallegasta brauðtertan: Steinunn Erla Sigurgeirsdóttir fyrir himneska hangikjötstertu. (Brauðterta skonsumeistarans)
• Frumlegasta brauðtertan: Berglind Ellý Jónsdóttir fyrir róttæka rækju og Ritz-kex tertu. (Brauðterta úr Hálsaskógi)
• Bragðbesta brauðtertan: Magnús Ingi Björgvinsson fyrir ljúffenga rækjutertu. (Brauðterta hversdagshetjunnar)
• Besta pörunin; brauðterta+kampavín: Ingimar Flóvent Marínósson fyrir túnfisktertu. (Brauðterta bakaradrengsins)

Dómnefndin var skipuð eftirtöldum aðilum:

• Mar­grét Dórót­hea Sig­fús­dótt­ir, fyrr­ver­andi skóla­stjóri Hús­stjórn­ar­skól­ans
• Sig­ríður Örvars­dótt­ir, safn­stjóri Lista­safns­ins á Ak­ur­eyri
• Erla Hlyns­dótt­ir, frá Brauðtertu­fé­lagi Erlu og Erlu
• Tóm­as Her­manns­son, út­gef­andi hjá Sög­um út­gáfu 

Glæsileg verðlaun voru veitt fyrir hvern flokk, en þau voru:

• Fyr­ir Íslands­meist­ar­ann: Gjafa­bréf að verðmæti 120.000,- krón­ur frá Icelandair
• Fyr­ir fal­leg­ustu brauðtert­una: Gjafa­bréf að verðmæti 15.000,- krón­ur frá Jóm­frúnni
• Fyr­ir bragðbestu brauðtert­una: Martusa, siki­leysk ólífu­olía beint frá bónda, 5 lítr­ar
• Fyr­ir frum­leg­ustu brauðtert­una: Bretti frá Kokku, til­valið fyr­ir brauðtert­ur.
• Sér­stak­ur auka­vinn­ing­ur: Kampa­vín, Drappier Brut Nature frá Sante.

Matarvefur mbl.is óskar öllum vinningshöfum innilega til hamingju með viðurkenningarnar og brauðtertuunnendum til hamingju með fyrstu brauðtertubók landsmanna, Stóru brauðtertubókina.