Bjarni gerði „kvenfélagslegustu“ brauðtertuna

Sjálfstæðisflokkurinn í Suðvesturkjördæmi stóð fyrir brauðtertukeppni í Kraganum í gær þar sem frambjóðendur kepptust um að útbúa vænlegar brauðtertur.

Keppnin fór fram í kosningamiðstöð Sjálfstæðisflokksins í Suðvesturkjördæmi að Silfursmára 4.

Voru meðal annars veitt verðlaun fyrir kvenfélagslegustu brauðtertuna, sem Bjarni Benediktsson formaður flokksins hreppti. Þórdís Kolbrún Reykfjörð Gylfadóttir hreppti aftur á móti verðlaunin fyrir bestu brauðtertuna. 

Friðrik V. Hraunfjörð matreiðslumeistari dæmdi frammistöðu keppenda en hann er einn af meðhöfundum bókarinnar Stóra Brauðtertubókin, sem kom nýverið út á vegum Sögur forlags.

Niðurstaða Friðriks var eftirfarandi:

1. Þórdís Kolbrún, besta brauðtertan
2. Rósa Guðbjartsdóttir, glæsilegasta brauðtertan
3. Sigríður Marta, frumlegasta brauðtertan
4. Hólmar Már, karlalegasta brauðtertan
5. Bjarni Benediktsson, kvenfélagslegasta brauðtertan