Matur | mbl | 18.11.2024 | 21:00

Ekta gamaldags sveitabrauð

Ekta gamaldags sveitabrauð sem minnir á gömlu, góðu tímana. Ljósmynd/Ingunn Mjöll

Gott brauð er gulls ígildi. Hver man ekki eftir gamla góða sveitabrauðinu sem naut mikilla vinsælda hér á árum áður? Ingunn Mjöll sem heldur úti heimasíðunni Íslandsmjöll deildi á dögunum með lesendum sínum þessari einföld og góð uppskrift af sveitabrauði. Það þarf ekki mikið af hráefnum í þetta brauð og svo er einstaklega einfalt að baka það. Þetta getur ekki klikkað.

Sveitabrauð

4 bollar hveiti
4 tsk. lyftiduft
1 msk. sykur
Salt eftir smekk, mætti alveg vera um 1-2 tsk. af saltinu til að finna bragð
Mjólk eða annar vökvi, til dæmis súrmjólk eftir þörfum

Aðferð:

Byrjið á því að hita ofninn í 175°C hita.
Setjið allt hráefnið nema vökvann saman í skál og hrærið vel.
Bætið síðan vökvanum saman við eftir þörfum.
Þið finnið fljót hvað þið viljið hafa mikinn vökva.
Þetta á að líta út eins og þykkur hafragrautur. það má leika sér með þessa uppskrift með því að minnka hveitið og setja eitthvað annað.
Setjið deigið síðan í klassísk brauðform.
Setjið inn í ofn og bakið við 175° í um það bil 50 mínútur á undir og yfir hita.
Ef ykkur finnst deigið vera blaut bætið þá við u.þ.b. 10-15 mínútum.
Gott er stinga í brauðið kökuprjóni til að sjá hvort brauðið sé tilbúið og ef ekkert kemur upp með prjóninum þá er það tilbúið.
Berið brauðið fram ylvolgt með smjöri og osti.