Matur | mbl | 24.11.2024 | 12:10

Jólaleg eplakaka sem yljar sálinni

Ekta jólaleg eplakaka úr smiðju Völlu Gröndal. Þessi yljar sálinni á góðum degi. Ljósmynd/Valla Gröndal

Epli og kanill er góð jólablanda og hefur ávallt verið í miklu uppáhaldi hjá Valgerði Grétu Gröndal sælkera og matarbloggara, alla jafna kölluð Valla. Hún deildi á dögunum með fylgjendum sínum á Instagram hugmynd af þessari jólalegu eplaböku sem sló í gegn á hennar heimili sem vel er hægt að mæla með.

„Allra handa eplakökur eru fljótar að rjúka út á mínu heimili og þessi er engin undantekning. Þrátt fyrir að vera formkaka er hún dúnmjúk og kryddbragðið passar fullkomlega með eplunum. Það er nefnilega eplasafinn sem á stóran þátt í að gera hana mjúka og djúsí og gefur auðvitað ennþá betra eplabragð,“ segir Valla um eplakökuna sína sem hún tileinkar jólunum.

View this post on Instagram

A post shared by Valla Gröndal (@vallagrondal)

Jólaleg eplabaka

2 græn epli, í minni kantinum
250 g hveiti
1 ½ tsk. lyftiduft
½ tsk. matarsódi
½ tsk. salt
4 tsk. kanill
1 tsk. malað engifer
½ tsk. negull
¼ tsk. allrahanda (má sleppa)
¼ tsk. múskat
160 ml. jurtaolía
200 g púðursykur
3 tsk. vanilludropar
2 stk. egg við stofuhita
60 ml. eplasafi frá Beutelsbacher
60 ml. grísk jógúrt

Aðferð:

Byrjið á því að hita ofninn í 175°C blástur. Smyrjið kringlótt formkökuform mjög vel að innan og dustið hveiti yfir.
Afhýðið eplin og rífið á rifjárni, setjið til hliðar.
Setjið öll þurrefnin saman í skál, blandið þeim saman með písk eða gaffli og setjið til hliðar.
Þeytið saman egg og sykur með k-áinu á hrærivélinni, bætið þá út í olíunni, vanilludropunum og grísku jógúrtinni og hrærið saman við.
Setjið þá helminginn af þurrefnunum út í og hrærið á rólegum hraða. Þá hellið þið eplasafanum saman við og klárið að hella þurrefnunum út í.
Munið að skafa niður á milli.
Hrærið aðeins áfram þar til deigið er samlagað.
Setjið þá eplin saman við með sleikju og setjið deigið í formið.
Bakið í 35-40 mínútur.
Kakan er tilbúin þegar prjóni sem stungið er í hana kemur hreinn upp.
Berið fram á fallegan og jólalegan hátt. Upplagt er sáldrað aðeins af flórsykri yfir kökuna ef þið viljið hafa hana jólalegri en það má sleppa því.