Matur | mbl | 4.12.2024 | 17:30

Ljúffengir smjördeigssnúðar með pestó, hráskinku og osti

Þessir eiga eftir að bráðna í munni. Þetta eru smjördeigssnúðar með pestó, hráskinku og osti. Ljósmynd/Helena Gunnarsdóttir

Heitir, ljúffengir snúðar með pestó, hráskinku og osti er fullkomnir til að njóta með kaffinu á góðri stundu. Helena Gunnarsdóttir hjá Eldhúsperlum á heiðurinn af þessari uppskrift og eitt er víst að þessir snúðar eiga eftir að hitta í mark. Uppskriftina gerði hún fyrir uppskriftavefinn Gott í matinn.

Það er líka svo sniðugt að geta keypt upprúllað tilbúið smjördeig og fyllt með góðgæti og góðum osti og bakað. Mikill munur að þurfa ekki að hafa fyrir því að gera deigið, bæði tímasparnaður og þægindi. Síðan má geyma rúlluna tilbúna í kæli og skera svo niður og baka rétt áður en á að bera fram.

Smjördeigssnúðar með pestó, hráskinku og osti

1 pk. upprúllað tilbúið smjördeig
1 krukka grænt pestó
1 bréf hráskinka
2 dl Óðals Tindur, rifinn
1 egg

Aðferð:

Hitið ofn í 200°C með blæstri.
Rúllið smjördeiginu út og smyrjið með pestó.
Rífið skinkuna aðeins niður og dreifið yfir ásamt ostinum.
Rúllið deiginu upp á lengri hliðina. Skerið í u.þ.b. 1,5 cm breiða snúða og raðið á bökunarplötu.
Pískið egginu saman og penslið yfir snúðana.
Bakið í 15-17 mínútur eða þar til snúðarnir verða gullinbrúnir.
Berið fram og njótið í góðum félagsskap.