Matur | mbl | 30.12.2024 | 8:00

Ísak gerir syndsamlega gott „Vanillu créme brulée“ með hindberjafyllingu

Syndsamlega gott „ Vanillu créme brulée“ með hindberjafyllingu verður áramótaeftirrétturinn sem Ísak Aron Jóhannsson fyrirliðið íslenska kokkalandsliðisins ætlar að bjóða upp á. mbl.is/Hákon

Landsliðskokkurinn og fyrirliðinn hæfileikaríki, Ísak Aron Jóhannsson, ætlar að bjóða upp á skotheldan áramótaeftirrétt á gamlárskvöld. Hér er á ferðinni syndsamlega ljúffengt „Vanillu créme brulée“ með hindberjafyllingu sem á eftir að gera gestina orðlausa af hrifingu.

Landsliðskokkurinn Ísak Aron Jóhannsson hefur ástríðu fyrir matar- og eftirréttagerð og nýtur sín um hátíðirnar. mbl.is/Hákon

„Vanillu créme brulée“ með hindberjafyllingu

Fyrir 6

375 g rjómi
125 g mjólk
75 g sykur
1 vanillustöng
120 gr eggjarauður
Hrásykur (eftir þörfum)

Aðferð:

Setjið mjólk, rjóma, sykur og vanillustöng saman í pott og leyfið suðunni að koma upp.
Takið síðan pottinn af hellunni og leyfið blöndunni að taka sig í um það bil 10 mínútur.
Fjarlægið vanillustöngina.
Setjið eggjarauður í hrærivélaskál og þeytið þær á meðan þið hellið mjólkurblöndunni í bunu saman við.
Fjarlægið froðuna sem myndast og deilið „créme brulée“-grunninum í skálarnar með hindberjafyllingunni, sjá uppskrift fyrir neðan.
Bakið í ofni við 90°C hita í u.þ.b. 45-60 mínútur.
Leyfið að kólna við stofuhita og berið fram með því að brenna hrásykur ofan á „créme brulée-inu.“

Hindberjafylling

375 g hindber
190 g sykur
2 límónur, rifinn börkur

Aðferð:

Byrjið á að setja hindber í pott ásamt sykri og leyfið suðunni að koma upp.
Takið pottinn af hitanum.
Hrærið í hindberjunum þangað til þau byrja að brotna niður og mynda eins konar sultu, takið af hita og bætið við rifnum berki af tveimur límónum.
Setjið hindberjafyllingu í sérhverja skál og leyfið að kólna í frysti meðan þið gerið „créme brulée-ið.“