Matur | mbl | 3.2.2025 | 12:30

Syndsamlega góður buffaló-kjúklingur með blómkáli og bræddum osti

Girnilegur buffaló-kjúklingarétturinn með blómkáli og bræddum osti. Ljósmynd/Thelma Þorbergsdóttir

Syndsamlega góði buffaló-kjúklingur rífur í og er fallegur í fati. Þennan rétt er fljótlegt að gera og hentar sem kvöldmatur, réttur á veisluhlaðborðið eða fyrir matarklúbbinn.

Blómkálið er einstaklega gott svona stökkt með kjúklingum og bræddum ostinum á meðan kotasælan og rjómaosturinn gefa einstaka áferð. Heiðurinn af þessari uppskrift á Thelma Þorbergsdóttir matarbloggari og gerði hún réttinn fyrir uppskriftavefinn Gott í matinn.

Buffaló-kjúklingur með blómkáli og bræddum osti

Fyrir 4

4 stk. kjúklingabringur
400 g kotasæla
200 g hreinn rjómaostur frá MS
60 ml Frank's Red hot buffaló sósa
200 g mexíkósk ostablanda frá Gott í matinn
2 tsk. hvítlaukssalt
½ haus blómkál

Meðlæti og til skrauts

Vorlaukur
nachos flögur

Aðferð:

Eldið kjúklingabringurnar, annaðhvort með því að steikja þær á pönnu eða grilla á grilli.
Kryddið kjúklinginn með hvítlaukssalti og skerið svo niður í munnbitastærð.
Setjið kotasælu, rjómaost og 100 g af Mexíkó-ostablöndunni saman í skál ásamt buffalósósunni og hrærið þar til allt hefur blandast vel saman.
Setjið kjúklinginn saman við, hrærið öllu saman og setjið í eldfast mót.
Skerið blómkál gróflega niður og raðið því þétt ofan á kjúklingablönduna.
Setjið restina af Mexíkó-ostinum yfir blómkálið og hitið inni í ofni við 180°C hita þar til osturinn hefur náð að bráðna alveg.
Berið fram með niðurskornum vorlauk og nachos-snakkflögum.