Hreindýralundir með villibráðarsósu með gráðaosti

Kristinn Magnússon

Hér er á ferðinni algjörlega mögnuð máltíð og þá ekki síst kartöflusalatið sem er með því betra sem eldað hefur verið norðan alpafjalla og þótt víðar væri leitað.

Uppskriftin birtist fyrst í Hátíðarmatarblaði mbl og Hagkaups sem helgað var villibráð að þessu sinni.

Hreindýralundir með villibráðarsósu með gráðaosti

Hreindýralundir

500 g lundir
2 stk. hvítlauksrif – kramin
3 greinar rósmarín
Olía
Smjör
Salt
Pipar

Aðferð:

Kjötið er þerrað, saltað og piprað. Panna er hituð vel upp með olíunni og hreindýrið sett á hana mjög heita, þegar góður litur hefur komið á kjötið, eftir sirka 1 mínútu, er því snúið við og smjörinu, hvítlauknum og rósmaríngreinunum bætt út á, steikt áfram í sirka 1 mínútu, en tímalengd fer þó alltaf eftir þykkt bitans og hita pönnunnar. Gott er að ausa aðeins af smjörinu yfir kjötið í lokin og taka pönnuna síðan af hitanum og klára að elda kjötið með því að velta því upp úr heitu smjörinu, en ákjósanlegur kjarnhiti er um 55°C.

Ferskt salat með perum, pekanhnetum, geitaosti og granateplum

200 g klettasalat
2 stk. perur
100 g pekanhnetur
½ stk. granatepli
100 g mozzarella-perlur
Góð ólífuolía

Aðferð:

Klettasalatið skolað og þerrað. Perurnar skornar, granateplið hreinsað, mozzarella-osturinn sigtaður frá vökvanum og pekanhneturnar ristaðar á pönnu og skornar aðeins smærra. Þá er öllu blandað saman í skál með olíunni, gott getur verið að salta smá yfir.

Besta kartöflusalatið

500 g kartöflur
150 g beikon
½-1 stk. rauðlaukur
4 stk. vorlaukur
1 krukka fetaostur
2 msk. gróftkorna
Dijon-sinnep
Salt

Aðferð:

Kartöflurnar soðnar í söltu vatni. Þegar þær eru mjúkar í gegn eru þær skornar í helminga eða fjórðunga, fer eftir stærð. Beikonið er skorið smátt og steikt á pönnu þar til stökkt. Rauðlaukurinn og vorlaukurinn skorinn smátt. Fetaosturinn sigtaður frá olíunni og Dijon-sinnepinu er hrært út í olíuna. Þá er kartöflunum, beikoninu, laukunum og fetaostinum blandað saman, smakkað til með fetaosts-dressingunni og salti. Borið fram volgt.

Villibráðarsósa með gráðaosti

½ l vatn
3 msk. villibráðarkraftur
2 ½ dl rjómi
1 msk. rifsberjagel
1 msk. sojasósa
Gráðaostur
Maizena
Sósulitur

Aðferð:

Vatn, villibráðarkraftur, rjómi og rifsberjagel sett saman í pott og soðið niður um ¼. Þá er sojasósunni og gráðaostinum bætt út í. Magn af gráðaosti fer algjörlega eftir smekk, en ég mæli með að setja minna í einu og smakka til og bæta þá frekar út í. Í lokin má svo þykkja sósuna og setja í hana matarlit.