Lögreglumenn örþreyttir

„Ég veit ekki hvort almenningur eða stjórnmálamenn átta sig á því að fjárveitingar til lögreglu eru og hafa verið of lágar. Löggæslan þarf, af nauðsyn, að miða sig mjög mikið við skemmtanalíf landsins og afleiðingar áfengisneyslu. Þannig er meiri áhersla lögð á kvöld- og helgarlöggæslu, en að degi til er löggæslan í þvílíku lágmarki að skömm er að.“

Þetta segir Guðmundur Fylkisson aðalvarðstjóri í grein sem hann ritar í Morgunblaðið í dag.

„Á svæðum þar sem þúsundir og jafnvel tugþúsundir eru á ferðinni um helgar, að degi til, er löggæsla svipuð og á Hólmavík,“ segir Guðmundur.

Hann segir að almenningur hafi ekki aðgang að lögreglu vegna „venjulegra“ hluta nema á dagvinnutíma á virkum dögum með tilheyrandi óhagræði því lögreglumenn þurfi að reyna að ná hvíld á daginn til að vera í vinnu á kvöld- og næturvöktum. Stundum gangi það ekki upp og lögreglumennirnir séu örþreyttir eftir vaktirnar.