Fjarskiptahnettir rákust saman

Tveir gervihnettir, fjarskiptahnöttur í eigu bandaríska fjarskiptafélagsins Iridium og rússneskur gervihnöttur sem ekki var í notkun, rákust saman á miklum hraða í 780 km hæð yfir Síberíu. Er þetta í fyrsta skipti, sem gervihnettir rekast saman úti í geimnum.

Við áreksturinn tættust hnettirnir í sundur.  Að sögn bandarísku geimferðastofnunarinnar NASA er ekki talið að alþjóðlegu geimstöðinni stafi hætta af braki úr hnöttunum en stöðin er á sporbaug 435 km neðan við svæðið. Þá er ekki  heldur talið að áreksturinn hafi áhrif á fyrirhugaða geimferð geimferju síðar í febrúar.

Rússneski hnötturinn vó 950 kg en honum var skotið á loft árið 1993. Iridium gervihnötturinn vó 560 kg en hann hefur verið í geimnum frá 1997.   

Vonast er til að brakið úr hnöttunum brenni upp í lofthjúpi jarðar. Fylgst er með mörg hundruð bútum úr gervihnöttunum. 

Um 6000 gervihnettir hafa verið sendir á sporbraut úti í geimnum frá árinu 1957. 

• 3 blogg um fréttina

Bloggað um fréttina

• Guðmundur Ásgeirsson: Tilviljanakennt óhapp?
• Sigurbjörn Friðriksson: Nú er þörf á umferðarreglum í geymnum.
• Eggert J. Eiríksson: Minnir mig á orðatiltækið ..