„Vissi ekki einu sinni af honum“

„Þetta var bara það sem ég ætlaði mér. Ég hefði ekki verið ánægður ef þetta hefði ekki tekist,“ sagði Sveinn Elías Elíasson úr Fjölni eftir að hann kom fyrstur í mark í 400 metra hlaupi á Meistaramóti Íslands í frjálsum íþróttum á Laugardalsvelli.

Sveinn Elías vann jafnframt sigur í 100 metra hlaupi fyrr í dag. 

„Það var svolítið mikill munur í 100 metra hlaupinu þannig að ég er bara sáttur enda hljóp ég á 11,06 sekúndum í -4 m/s mótvindi,“ sagði Sveinn Elías en næstur kom Trausti Stefánsson úr FH á 11,23 sekúndum. Trausti var síðan nálægt því að komast fram úr Sveini á lokaspretti 400 metra hlaupsins.

„Ég vissi nú ekki einu sinni af honum, ég reyndi að líta hægra megin við mig en hefði kannski átt að líta í báðar áttir. Ég hafði samt engar áhyggjur og hljóp bara af öryggi. Boðhlaupið er á eftir og ég vildi vera klár í það. Ef allt gengur upp í skiptingunum þar vonumst við alla vega eftir verðlaunasæti þar,“ sagði Sveinn en hann kom í mark á 49,56 sekúndum, 26/100 á undan Trausta.

Sveinn hefur því átt góðan dag í Laugardalnum en hann segist eiga mikið inni. 

„Ég myndi vilja vera í betra formi en reif lærvöðva þrisvar í vetur og það hefur haft sín áhrif. Ég var í miklu betra formi áður en þetta gerðist en er samt alveg búinn að jafna mig núna og er smám saman að komast í nokkuð gott form,“ sagði Sveinn sem ætlar sér að sjálfsögðu einnig sigur í 200 metra hlaupinu á morgun.

• Blogga um frétt