Áhugasöm Hópur nema á íslenskubraut. Þau eru á þriðju önn en komið er á þann stað í náminu að farið er út í nærsamfélagið, til dæmis á leikskóla og félagsmiðstöð aldraðra, og spjallað við fólk og þannig fengin þjálfun í talmáli.
— Morgunblaðið/Sigurður Bogi
Sigurður Bogi Sævarsson
sbs@mbl.is
„Margir nemenda okkar eru ótrúlega fljótir að ná grunnfærni í íslensku, sem svo verður meiri með tímanum. Þá er líka mjög ánægjulegt að eftir fjögurra anna nám fara margir þessara krakka í frekara nám, svo sem í iðngreinum, enda hefur þeim verið kynnt hvað hér er í boði,“ segir Inga Huld Guðmannsdóttir, kennari við Tækniskólann.
Inga Huld kennir í Tækniskólanum á íslenskubraut, sem er ætluð nemendum með annað móðurmál en íslensku og hafa þar með ólíkan bakgrunn hvað varðar nám, menningu og tungumál. Í náminu er farið í tungumálið, en góð geta og færni í því er lykill að íslensku samfélagi, enda er líka um það fjallað og frætt á brautinni.