![](/myndir/gagnasafn/2024/09/07/30de4fda-4fdd-420f-af5d-620f1e55b14f.jpg)
— AFP/Simon Maina
Embættismenn í Keníu staðfestu í gær að minnst sautján drengir hefðu farist í eldi sem braust út á heimavist við Hillside Endarasha-skólann í Nyeri-sýslu um miðnætti í fyrrinótt. Rúmlega 150 drengir voru á heimavistinni þegar eldurinn braust út og var sjötíu þeirra enn saknað í gær.
Forseti Keníu, William Ruto, lýsti í gær yfir þriggja daga þjóðarsorg frá og með næsta mánudegi eftir þennan ólýsanlega harmleik, en drengirnir sem létust voru á aldrinum 9 til 13 ára.
Foreldrar og aðstandendur komu til þess að leita að ástvinum sínum, en aðstæðum var lýst sem hrikalegum. Að sögn sjónarvotta brustu margir foreldranna í grát eftir að þeir sáu aðstæðurnar inni á heimavistinni.