Velkomin í Sorgarklúbbinn

Guðrún Jóna Guðlaugsdóttir vinnur með sorg á hverjum degi. Ýmist sína sorg eða annarra. Hún var ein af stofnendum Sorgarmiðstöðvar og vinnur í dag við forvarnir gegn sjálfsvígum hjá Landslæknisembættinu. Guðrún Jóna hefur upplifað sorgina í sinni dýpstu mynd, þegar sextán ára gamall sonur hennar lést í sjálfsvígi. Allar götur síðan hefur hún stuðlað því að hjálpa fólki í sorg við að takast á við það risavaxna verkefni sem missir náins einstaklings er. Minningarsjóður um drenginn hennar hefur styrkt mörg verkefni sem miða að aukinni fræðslu um sorg og hvernig á að takast á við hana. Bókin Velkomin í sorgarklúbbinn er nýjasta verkefnið en hún kom út fyrir helgi. Guðrún Jóna segist vera sorgarnörd og hún er gestur Dagmála í dag.