Nærbuxur bæði karlkyns og kvenkyns Reykvíkinga skullu í gólfið með látum þegar þessi frétt kom á netið fyrir stundu. Ryan Gosling er á landinu og miðað við upplausnina sem varð þegar Ed Westwick mætti á klakann hér um árið má búast við að nú þegar hafi myndast örtröð örvæntingafullra aðdáenda Gosling á Keflavíkurflugvelli. 

Ef Gosling ákveður að gera sér glaðan dag á Íslandi er nokkuð víst að hann verður hundeltur. Monitor tók saman fimm staði í Reykjavík og nágrenni þar sem líklegast er að þér takist að rekast á goðið og hvernig þú átt að ná athygli hans. 

Á leið sinni frá Leifsstöð er góður möguleiki á því að Gosling skelli sér í Bláa Lónið. Þetta er ekki bara tækifæri til að dást að honum berum að ofan heldur getur þú einnig boðist til að bera á hann hvíta gumsið úr lóninu.

„Stundum held ég að það sem ég elski mest við að vera fullorðinn sé að hafa rétt á að kaupa nammi hvar og hvenær sem ég vil.“ - Ryan Gosling

Gosling elskar sumsé sælgæti. Komdu þér fyrir við einhverja vel valda sælgætisverslun í miðbænum og bíddu færis eða fylltu vasana af íslensku nammi til að vinna hjarta hans ef þú skildir rekast á hann.

Gosling er dýravinur og því er ekki ólíklegt að hann vilji demba sér í hvalaskoðun. Lærðu að sprauta vatni út um nefið á þér eða framkalla höfrungahljóð og leyfðu Gosling að heillast af hinu séríslenska og dularfulla náttúrubarni innra með þér.

Ef Gosling stoppar bara í einn dag verður án efa farið með hann gullna hringinn. Stattu hinum megin við Strokk svo þú verðir það fyrsta sem Gosling sér þegar hann er búinn að gjósa. Ef þú getur reddað vindvél er það plús.

„Ef ég borða stóra máltíð og get fengið stelpuna til að strjúka mér um magann eftir á, þá það er nokkurn veginn það rómantískasta sem mér dettur í hug.“ -Ryan Gosling

Stjörnur verða að borða og síðasta sumar borðuðu allar stjörnurnar á Sushi Samba. Þú veist hvað þú þarft að gera.

Merkilegt nokk virðist Austur vera skylduáningarstaður stjarnanna þegar þær heimsækja Ísland. Sumar þeirra leita þó einnig á B5 og á miðvikudagskveldi sem þessu er alls ekki ólíklegt að Gosling heimsæki Kaffibarinn. Þá er komið að þér að skína á dansgólfinu og heilla hann með mjaðmahnykkjum.

Kannski færðu smá hristu á móti.

Hver veit. Ef þú spilar rétt úr því sem þér er gefið gæti þetta verið þú í lok kvölds.

Erum við samt ekki að gleyma einhverju?

Kannski, en gleymum Evu Mendes bara aðeins lengur. 

Ef ske kynni að Gosling yfirgefi svæðið áður en þú nærð að berja hann augum, er Monitor með meðferðarúrræði fyrir þig á reiðum höndum. 

Tengdar fréttir

Ryan Gosling

Barbie þurrkaði upp birgðirnar af bleikri málningu

• Ryan Gosling borðar morgunkornið sitt
• 12 ára Gosling leikur á als oddi
• Hnakkrifust við upptökur á Notebook
• Ryan Gosling er á lausu - staðfest

» Fleiri tengdar fréttir

• 1 blogg um fréttina

Bloggað um fréttina

• Júlíus Már Baldursson: Já hvar skildi hann svo vera????