Sigurvegararnir í Akureyrarriðli Skólahreysti, Síðuskóli, ætla sér stóra hluti á úrslitakvöldinu sem fram fer næstkomandi föstudag. Skólinn náði góðum og jöfnum árangri í öllum greinum sem gefur til kynna að liðið sé líklegt til að enda ofarlega í úrslitunum.

Úrslitakeppnin í Skólahreysti fer fram í Laugardalshöll föstudaginn 16. maí næstkomandi. Af því tilefni kynnir Monitor öll liðin sem keppa. Þrjú lið verða kynnt á degi hverjum, fram á föstudag. Að þessu sinni kynnumst við liði Síðuskóla.

Lið Síðuskóla skipa þau Ingibjörg Sól Ævarsdóttir, Melkorka Ýrr Yrsudóttir, Svavar Sigurður Sigurðsson og Hrannar Ingi Óttarsson. Af þeim hefur Svavar einn keppt áður í Skólahreysti en hann tók þátt í fyrra, þegar Síðuskóli komst í úrslit. Hann ætti því að geta miðlað af reynslu sinni.

Keppendur skipta á milli sín keppnisgreinum. Hrannar Ingi spreytir sig á upphífingum og dýfum meðan Svavar Sigurður keppir í hraðaþrautinni. Hjá stelpunum er hið sama uppi á teningnum: Ingibjörg Sól keppir í armbeygjum og hreystigreip, en Melkorka Ýrr tekur þátt í hraðaþrautinni.

Þannig fátt sé nefnt þá hefur Melkorka æft dans í sex ár, eða frá því hún var tíu ára, og frjálsar íþróttir í fjögur ár. Þessi bakgrunnur ætti að vera henni til góðs í hraðaþrautinni. Hrannar Ingi hefur aldrei stundað skipulagðar íþróttir en síðan hann kynntist Skólahreysti hefur hann lyft lóðum af miklum móð og ætti því að vera vel tilbúinn í úrslitakeppnina.

Skólahreysti

• Skólahreysti er liðakeppni milli grunnskóla landsins.
• Skólahreysti byrjaði árið 2005 með þátttöku sex skóla. Í ár voru um 110 grunnskólar af öllu landinu sem tóku þátt.
• Úrslitakeppni þeirra tólf skóla sem náðu bestum árangri í undankeppninni fer fram föstudaginn 16. maí næstkomandi.
• Keppnisgreinarnar eru upphífingar, armbeygjur, dýfur, hreystigreip og hraðaþraut.

Tengdar fréttir

Skólahreysti

Heiðarskóli sigraði með hálfu stigi

• Íslandsmetið slegið degi eftir að það var sett
• Hékk í rúmt korter og sló Íslandsmet
• Erfitt að spá fyrir um úrslitin
• Skólahreysti yfirtekur Reykjanesbæ

» Fleiri tengdar fréttir

• Blogga um frétt