Vík í Mýrdal

Loka

Jónas Erlendsson

Vík í Mýrdal

Kaupa Í körfu

Fjölbreytni mannlífsins kemur vel fram á ljósmyndum fréttaritara Morgunblaðsins á landsbyggðinni sem birtast daglega í blaðinu. Þær eru eins konar spegill þjóðarinnar. Lokið er samkeppni um bestu ljósmyndir fréttaritara frá árunum 2005 og 2006 sem Morgunblaðið og Okkar menn, félag fréttaritaranna, efndu til í byrjun þessa árs. Mörg hundruð myndir bárust dómnefnd. Úrslit voru kynnt og verðlaun afhent á aðalfundi Okkar manna sem haldinn var í Morgunblaðshúsinu í Reykjavík í gær. Dómnefnd valdi "Skýjahöll", mynd Jónasar Erlendssonar, fréttaritara Morgunblaðsins í Mýrdal, sem mynd keppninnar. Einnig voru veitt verðlaun í átta keppnisflokkum. Verðlaunamyndirnar og valdar myndir úr keppninni hafa verið settar upp á sýningu í verslunarmiðstöðinni Smáralind, neðri hæð. Myndirnar verða þar til 4. apríl næstkomandi og verða síðan settar upp á nokkrum stöðum á landsbyggðinni. MYNDATEXTI Skýjahöll Sérkennileg sjón blasti við þeim sem voru á ferðinni í Víkurfjöru dag einn í lok janúar 2005 en þá höfðu hrúgast upp afar skemmtilegir skýjabakkar yfir Hrafnatindum ofan þorpsins í Vík í Mýrdal. Jónas Erlendsson, fréttaritari og ljósmyndari í Mýrdal, náði að fanga augnablikið og var mynd hans valin besta myndin í ljósmyndasamkeppni fréttaritara og besta myndin í flokki mynda úr náttúru og umhverfi.

Frekari upplýsingar