Farsældarsáttmálinn kominn í gagnið

Farsældarsáttmálinn hefur verið formlega gefinn út. Af því tilefni var Ásmundi Einari Daðasyni, mennta- og barnamálaráðherra, afhentur fyrsti sáttmálinn við hátíðlega athöfn í Rimaskóla.

Farsældarsáttmálinn er verkfæri sem gerir foreldrum og öðrum sem koma að degi barnsins kleift að ræða sín á milli og setja niður ákveðin viðmið eða gildi sem þeim finnast mikilvæg til þess að styðja við þroska og farsæld allra barna í nærsamfélaginu.

Uppruna Farsældarsáttmálans má rekja til viðamikils samtals Heimilis og skóla við foreldra, skólastjórnendur, kennara og aðra sem koma að starfi með börnum og ungmennum þar sem fram kom ákall um endurvakningu foreldrastarfs og valdeflingu foreldra. Ákveðið var að fara í vinnu við gerð Farsældarsáttmálans sem byggist á áratuga reynslu og traustum grunni sem reynst hefur vel til þess að virkja foreldra til samstarfs.

Nánari upplýsingar um hvernig nota má sáttmálann má finna á heimasíðu Heimilis og skóla.

Ásmundur Einar Daðason, mennta- og barnamálaráðherra og Þorvar Hafsteinsson, formaður Heimilis og skóla ásamt nemendum í 9. bekk í Rimaskóla. Ljósmynd/Aðsend

• Blogga um frétt