Fyrirsætustörf á hvalvertíð

Þeir Gísli Steinn Arnarson og Ingvar Freyr Ingvarsson, eru á hvalvertíð í Hvalfirði í allt sumar, en í frítíma sínum stilla þeir sér upp fyrir Júlíus Andra, sem einnig er staddur í Hvalfirði. 

„Við erum búnir að vera hérna í tvær til þrjár vikur. Þetta er mikil törn, en við vinnum í átta klukkustundir og svo fáum við átta klukkustunda svefn og svo koll af kolli,“ sagði Ingvar Freyr um vaktirnar í hvalvertíðinni. 

Aðspurður hvort að rútínan tæki ekki á, sagði hann svo vera: „Þetta venst en fyrsta vikan er alltaf erfið.“

Til þess að brjóta upp daginn ákváðu félagarnir Gísli Steinn, Ingvar Freyr og Júlíus Andri að taka nokkrar tískuljósmyndir. „Þetta er bara eitthvað svona sem við vorum að leika okkur að gera. Þetta er meira gert í gríni en alvöru,“ sagði Ingvar Freyr, sem er á lausu. 

Aðspurður hvort að ljósmyndirnar hefðu verið teknar mögulega til að vekja athygli kvenna á honum vildi hann ekki meina að svo væri. „Nei þetta er bara létt grín.“

Strákarnir eru þegar byrjaðir að undirbúa næstu myndatöku. „Við gerum eitthvað óvænt,“ sagði Ingvar Freyr, sem vildi ekki tjá sig meira um fyrirhugaða myndatöku.