Smartland Mörtu Maríu | Frami | mbl | 30.11.2021 | 13:00

Settur í tossabekk og skipað að sitja kyrr

Matthías Már Magnússon er tónlistarstjóri á Rás 2. Ljósmynd/Aðsend

Matthías Már Magnússon, tónlistarstjóri á Rás 2, átti erfitt með að sitja kyrr í skóla og kláraði ekki framhaldsskóla. Hann fann sig að lokum í útvarpi og þrátt fyrir að hafa hvorki lokið stúdentsprófi né grunnnámi í háskóla kláraði hann meistaranám frá háskóla á Englandi. Matthías eða Matti eins og hann er kallaur er gestur Kötu Vignis í hlaðvarpsþættinum Farðu úr bænum.

Eins og margir krakkar átti Matti erfitt með að læra sem varð til þess að hann fékk lélegar einkunnir í öllu nema ensku í grunnskóla. Kennararnir boðuðu mömmu hans á fund af því að þeir skildu ekki af hverju hann væri með svona lélegar einkunnir. Matti hafði einfaldlega
ekki áhuga á námsefninu og kennsluaðferðirnar hentuðu honum engan veginn.

„Ég átti rosalega erfitt með að fara inn í skólastofu og sitja kjurr í klukkutíma. Það hentaði mér mjög illa. Og á þessum tíma þegar að ég er í grunnskóla var ég bara settur í einhvern tossa bekk sko. Ég var aldrei spurður hvernig eigum við að kenna þér heldur var mér bara skipað að sitja kjurr.“

Eftir grunnskóla byrjaði Matti á því að læra hárgreiðslu en kláraði ekki námið og tók ekki stúdentspróf heldur. Hann fór að vinna á ýmsum stöðum og svo eftir að hafa unnið í útvarpi í nokkur ár fékk hann löngun til að fara aftur í nám. Hann ákvað þá að sækja um meistaranám í Englandi sem hann komst inn í út af reynslunni sinni á vinnumarkaði og gekk vel í því.

Matti var sendur einn í sveit til að vinna fyrst þegar að hann var sex ára gamall. Hann fór aftur í sveit nokkrum sinnum á æskuárunum. Í einni sveitinni sem hann fór í var unnið mikið og ekki verið að flækja matseðilinn mikið fyrir sér. Það var alltaf vel saltur
hafragrautur á morgnanna, ýsa á mánudögum og svo kjöt.

„Hádegi á þriðjudegi voru sem sagt kjötbollur í brúnni sósu sem að hún gerði á svona stórri pönnu og ég er ekki að grínast, það sem eftir lifði af viku þá bætti hún við bara á pönnuna kjötbollum og brúnni sósu og sauð fleiri kartöflur og það var í hádegis og kvöldmat
fram á sunnudag,“ sagði Matti um lífið í sveitinni. „Svo var læri á sunnudögum, svona rúllaði þetta, ég borðaði ekki kjötbollur í mörg ár eftir þetta.”

Hægt er að hlusta á Farðu úr bænum á hlaðvarpsvef mbl.is.