Sólrún Diego og Lína Birgitta létu sig ekki vanta

Það var líf og fjör í menningarhúsi Hörpu þegar umhverfismiðladagurinn SKILABOÐ 2024 fór fram hinn 15. febrúar síðastliðinn. Fjöldi fólks lagði leið sína á ráðstefnuna og hlýddi á áhugaverð erindi fyrirlesara. Grínistinn góðkunni Sólmundur Hólm Sólmundarson, jafnan kallaður Sóli Hólm, sá um að halda hlutunum gangandi og gerði það með glans.

Erindi dagsins einblíndu á birtingar, rannsóknir og hvað það er sem gerir auglýsingar og markaðsherferðir árangursríkar. 

Meiri árangur næst með vel hönnuðu markaðsefni

Vésteinn Gauti Hauksson, framkvæmdarstjóri Billboard, sýndi fram á meiri árangur með vel hönnuðu markaðsefni. Hann hvatti viðskiptavini óspart til að nýta sér þjónustu fagmanna svo að markaðsefnið myndi ná og skila sem mestum árangri.

Ólafur Þór Gylfason, sviðsstjóri markaðsrannsókna hjá Maskínu, fór yfir gögn sem sýna töluverðan mun á því hvar kjósendur stjórnmálaflokka aka um borgina. Gögnin gefa því til kynna að hægt sé að velja birtingarstað eftir vöruflokkum, hegðunarmynstri og eða skoðunum þeirra sem aka um höfuðborgarsvæðið.

Tveir erlendir gestafyrirlesarar fluttu erindi á ráðstefnunni, Dino Burbidge og Nicola Fox. Burbidge fór yfir skemmtilegt auglýsingaefni sem hefur verið birt á frumlegan máta í öðrum löndum en Fox sýndi gögn sem benda til þess að árangur af markaðsherferðum sé enn betri ef notast er við umhverfismiðla sem hlusta af herferðinni.