Þarf að greiða skatta af Onlyfans-vinnu?

Eymundur Sveinn Einarsson endurskoðandi hjá Endurskoðun & ráðgjöf svarar spurningum lesenda Smartlands. Hér fær hann spurningu frá Onlyfans-stjörnu sem þénar meira en áætlað var, 

Sæll Eymundur.

Ég stofnaði Onlyfans-reikning fyrir hálfu ári síðan. Ég átti ekki von á að af þessu yrðu miklar tekjur en raunin hefur orðið önnur. Ég skapaði mér fljótlega sérstöðu sem karlmenn í útlöndum eru sérlega hrifnir af. Ég þéna því meira á þessu en ég átti von á. Þá kemur að spurningum. Eru þetta skattskyldar tekjur og sé svo er það þá í því landi sem þeir eru sem eru að horfa á myndbönd mín og ræða við mig? Þá hef ég „gefið“ þeim nærbuxur og annan varning sem ég hef notað. Er það flokkað sem gjöf eða hvernig á ég að gera grein fyrir því? Þeir greiða ekki beint fyrir þetta heldur fá þeir svona sem borga hæstu áskriftina og panta mest af sérefni.

Kveðja, 

kvikmyndastjarnan sem vill hafa allt á hreinu

Sæl. 

Meira og minna eru allar tekjur skattskyldar sama hvaða nafni þær nefnast eða hvernig þeirra er aflað. Skattskyldan er hér á Íslandi þar sem þjónustan er veitt héðan með rafrænum hætti. Síðan er beinn kostnaður við öflun tekna frádráttarbær og væntanlega fellur kostnaður þinn við kaup á varningi til þar undir.

Af þessum tekjum greiðist tekjuskattur sem er allt að 46% auk launatengdra gjalda þannig að þér ber að skrá þig á launagreiðendaskrá og skila af þessu tekjuskatti og launatengdum gjöldum mánaðarlega sem kemur jafnframt í veg fyrir leiðinda bakreikning frá skattinum á vordögum.

Ég myndi ennfremur ráðleggja þér að kynna þér efni um atvinnurekstur á vef Skattsins, www.skattur.is en þar finnur þú allar upplýsingar um þær reglur sem gilda um sjálfstæða starfsemi.

Kveðja, 

Eymundur. 

Liggur þér eitthvað á hjarta? Þú getur sent Eymundi spurningu HÉR. 

• Blogga um frétt