Áhrifavaldurinn Erna Kristín Stefánsdóttir stofnaði nýlega hinn ört stækkandi hóp Jákvæð líkamsímynd á Facebook. Hópurinn er opinn öllum kynjum á öllum aldri en Erna segir hópinn vera vettvang fyrir fólk til að deila reynslu sinni með öðrum hvað varðar neikvæða og eða jákvæða líkamsímynd. „Það er mikil hvatning inni í hópnum og fólk er að stíga langt út fyrir þægindarammann, sem er stórt skref fyrir marga og á sama tíma mjög hvetjandi fyrir aðra,“ segir Erna um hópinn. 

„Ég stofnaði þennan hóp vegna þess að ég vinn mikið með jákvæða líkamsímynd á samfélagsmiðlum, þar sem ég tala mikið frá minni reynslu. Það hefur hjálpað gríðarlega mörgum að leita inn á við og brjótast í gegnum erfiðar tilfinningar í garð líkama síns. Miðað við áhrifin á mínum miðlum út frá minni reynslu vildi ég því opna hóp þar sem fleiri sjónarmið fengju rými, því við erum öll svo ólík og dásamlega flókin á okkar eigin hátt, og því tel ég mikilvægt að allskonar upplifanir fái rými,“ segir Erna um það af hverju hún ákvað að stofna hópinn. 

Eins og líkaminn sé skapaður af tölvuforritum

„Samstaðan er alveg mögnuð í hópnum. Vandamálið er svo ríkjandi og hefur verið svo lengi, það hafa bara svo margir fengið nóg af óraunhæfum staðalímyndum. Við erum öll falleg á okkar eigin hátt, hvernig sem við erum, óháð stærð og hæð.“

Erna telur að það sé gríðarleg mikil þörf fyrir umræðu um jákvæða líkamsímynd. „Margar konur glíma við átröskunarsjúkdóma í dag og margar hafa eytt öllu sínu lífi í að rakka líkama sinn niður fyrir að passa ekki inn í þessa óraunhæfu fegurðarstaðla. Ungar stelpur hamast og hamast við að vera samþykktar og lífið snýst um að passa inn í þennan kassa. Líkamar kvenna hafa í gegnum aldirnar verið tískufyrirbæri og söluvara, og eru þessar staðalímyndir í raun það óraunhæfar að kvenlíkaminn er ekki lengur sköpun Guðs heldur sköpun tölvuforrita og Photoshop sem er mjög erfitt að keppa við.“ 

Erna deilir hinum ýmsu sjónarhornum af líkama sínum á samfélagsmiðlum.

Þú vinnur mikið á Instagram, hvaða áhrif finnst þér Instagram hafa á líkamsímynd fólks?

„Margir Instagram-aðgangar eru mjög „triggerandi“ og ýta rosalega undir þessa óraunhæfu staðalímyndir og glansmynd sem er að mestu tilbúningur. Ég myndi segja að margir væru farnir að gera sér grein fyrir því að glimmerhúðaður Instagram-reikningur sýni ekki raunverulegt líf einstaklingsins þótt það sýni til dæmis stíl og áhugamál viðkomandi. Ég tók mig til og eyddi öllum slíkum reikningum út, eða þá þeim sem hafa ruglandi áhrif á mig og mitt hugarfar og bætti við hellingi af „body positivelf  love-reikningum. Það er mikil vitundarvakning á Instagram að mínu mati, sem er mjög nauðsynlegt.“

Frelsi að elska líkama sinn eins og hann er

Hefur þú til dæmis sjálf staðið þig að því að vera ekki ánægð með myndir, eyða þeim eða stilla þér upp á grennandi hátt?

„Já, svo sannarlega, hugur okkar vinnur á mjög óskiljanlegan hátt, það er undir okkur komið að hafa stjórn og vera samkvæm sjálfum okkur. Ég hef glímt við líkamsímyndunarröskun og átröskun frá því ég man eftir mér. Það er alls ekkert óeðlilegt við það að mínu mati að gleyma sér af og til og halda að maður verði að fara eftir þessum stöðlum. Samfélagið hefur kennt okkur það frá því við vorum börn og það er einmitt ástæðan fyrir þessu stóra vandamáli sem við stöndum frammi fyrir í dag og höfum gert síðustu aldir.“

Hvað er til umræðu í hópnum? 

„Umræðan snýr mikið að hvað felst í sjálfsást og jákvæðri líkamsímynd. Mismunandi skoðanir, flestallar jákvæðar og uppbyggjandi. Vilji flestra er að hvetja áfram og fræða með mismunandi sjónarhornum og reynslu sem er mjög mikilvægt. Ég sé strax að síðan er að skila sér og boðskapurinn er að hafa áhrif sem er frábært. Ég hef sett innlegg hvað ég tel vera sjálfsást en mín upplifun er sú að við erum öll bara að taka skrefið og átta okkur enn betur á vandamálinu sem er æðislegt.

Ég er að læra mjög mikið sjálf og er það einmitt vegna þess að mismunandi sjónarhorn fá rými til að blómstra. Ég til dæmis deildi fyrir og eftir mynd, ekki þessum hefðbundnu myndum, heldur á fyrri myndinni er ég illa haldin af átröskun og verulega veik andlega. Á seinni myndinni er ég í bata með magann minn, læri og allt tilheyrandi. Það er svo mikið frelsi að komast á þennan stað að byrja virða og elska líkama sinn hvernig sem hann lítur út hvenær sem er yfir ævina.“

„Líkaminn okkar breytist fram og aftur yfir ævina og því engin ástæða að bíða eftir því að líta út eins og samfélagið samþykkir okkur, heldur læra að elska okkur hér og nú. Byrja að einblína á allt það sem líkaminn getur gert fyrir okkur en ekki aðeins hvernig hann á að líta út til að þóknast óraunhæfum staðalímyndum.“ 

Linkur á Jákvæð Líkamsímynd á Facebook. 

Tengdar fréttir

Líkamsvirðing

53 ára og sýnir ör, húðslit og appelsínuhúð á nýjum myndum

• „Bjóst aldrei við því að líkaminn myndi líta svona út eftir fæðingu“
• Halle Berry nakin á mæðradaginn
• „Kim Kardashian er ömurlegasta fyrirmynd kvenna“
• Bresk stjarna varar við fitusogi

» Fleiri tengdar fréttir

• Blogga um frétt