Smartland Mörtu Maríu | Heilsa | mbl | 10.1.2019 | 5:20

„Þú getur ekki æft af þér lélegt mataræði“

Anna Lovísa Þorláksdóttir hefur sett sér það markmið fyrir árið 2019 að vinna upp þol á styrk sem hún missti niður á meðgöngu. Árni Sæberg

Anna Lovísa Þorláksdóttir, verkefnastjóri og hóptímakennari í Sporthúsinu, er búin að strengja áramótaheit fyrir árið 2019. Hún segir algengt að fólk fari of geyst af stað en sjálf hefur hún reynslu af því að setja sér markmið og ná þeim. Þegar Anna Lovísa var 19 ára var hún 104 kíló og með hné sem voru að bugast undan álagi.

„Árið 2009 var ég 19 ára og 104 kíló. Ég er um 165 cm á hæð. Ég var með áreynsluastma og hné sem voru að bugast undan álagi. Mér leið ekki vel í eigin líkama og ákvað að núna væri þetta orðið gott. Það sem ég gerði þá var að byrja að breyta matarræðinu. Einfalt, minnkaði brauð, tók út nammi og sætindi nema leyfði mér um helgar. Hætti að drekka sykrað gos og ávaxtasafa, að drekka hitaeiningar getur verið stór ástæða þyngdaraukningar. Eftir fimm til sex vikur var ég tíu kílóum léttari. Þá hafði ég þor í að skrá mig í ræktina og eftir það var ekki aftur snúið. Byrjaði í hóptímum og að lokum var ég komin með einkaþjálfara í fjarþjálfun. Ég gerði fullt af mistökum á leiðinni, borðaði of mikið eða leyfði mér aðeins út fyrir rammann sem ég setti mér. Ég nennti stundum ekki á æfingu, það er eðlilegt,“ segir Anna Lovísa sem gafst ekki upp og segir það lykilinn að árangrinum. Á árunum 2009 til 2010 létti hún sig um 43 kíló og keppti í fitness árin 2011 og 2013.

Anna Lovísa breytti um lífstíl og grenntist töluvert á árunum 2009 og 2010. Ljósmynd/Aðsend

Anna Lovísa segist hafa sett sér misgáfuleg áramótaheit í gegnum tíðina en í ár ætlar hún að bæta þol og styrk, sem hún missti niður á meðgöngunni sem hún er að jafna sig á, hreyfa sig dags daglega fyrir utan æfingar, rækta vinasambönd og elska sjálfa sig þrátt fyrir galla og takmörk.

„Algengustu mistökin sem fólk gerir þegar kemur að áramótaheitum er að fara of geyst af stað og ætla sér of mikið og þá jafnvel á stuttum tíma. Ef þú hefur ekki hreyft þig af viti í langan tíma þá er engum greiði gerður að ætla að taka janúar með trompi og mæta á æfingu sex til átta sinnum í viku í einn til tvo tíma í senn. Það er ávísun á að þú endist ekki mikið meira en tvær til þrjár vikur. Ekki ákveða að fara að hreyfa þig til þess að verða grönn eða grannur heldur farðu að hreyfa þig því það er gott fyrir þig og þína heilsu og heilbrigði. Tvisvar til þrisvar sinnum í viku í tvær til þrjár vikur er nóg fyrir byrjendur og eftir fyrstu vikurnar getur fólk farið að auka við,“ segir Anna Lovísa sem er bæði með B.A. í tómstunda- og félagsmálafræði og diplóma í heilbrigðis- og heilsuuppeldi frá HÍ.

Hvaða máli skiptir mataræðið? Föstur og ketó eru líklega vinsælustu heilsutrendin í dag, hvaða skoðun hefur þú á því? Er eitthvað sem fólk þarf að varast?

„Mataræðið er 80% af árangrinum. Þú getur ekki æft af þér lélegt mataræði. Ef þú ert með mataræðið yfir daginn/vikuna á hreinu upp á 75-85% þá hefurðu smá svigrúm til þess að njóta einhvers sem þú kannski færð þér ekki á hverjum degi.“

Anna Lovísa Þorláksdóttir. Árni Sæberg

„Varðandi ketó og föstur þá hef ég prófað bæði, og mín skoðun er sú að fólk velur sér það sem hentar þvi best. Ketó er lágkolvetnamataræði með mikilli fituinntöku og prótein en lítið af kolvetnum og margir hverjir elska það og vegnar vel á slíku og er það bara frábært og að mínu mati ekkert verra en hvað annað. Fösturnar aftur á móti eru meira mín deild, það hentar mér mjög vel 16:8 eða 17:7 konseptið. Mér finnst oft erfitt að borða á morgnana og nota oftast gluggann 11/12 – 19/20. En föstur eru alls ekki einhver „megrunarleið“ heldur býr það bara til „fæðuglugga“, þessir 7-8 klukkutímar sem þú notar til að borða hitaeiningafjölda þinn yfir daginn í stað þess að borða yfir lengri tíma og þar af leiðandi auðveldara að hafa stjórn á hitaeiningainntökunni. Sem hentar mér mjög vel og hefur reynst fjölda fólks vel við fitutap og þyngdaraukningu/vöðvauppbyggingu ef út í það er farið.“

Anna Lovísa er virk á Snapchat undir notendanafninu Lovisa11 og notar appið til þess að hvetja sig og fylgjendur sína með sér.