Fagra hluti, muni og efni til heimilisins úr fórum íslenskra og erlendra hönnuða sem og einstakra framleiðslufyrirtækja rak á fjörur Smartlands á árinu. Hér gefur að líta brot af því besta:

• Fjallað var um sérsniðið gólfefni sem Bolefloor framleiðir en það er fyrsta fyrirtækið í heiminum til að verksmiðjuframleiða gólfefni sem fylgir náttúrulegu línunum sem eru í trjám.
• Óvenjulegt taflborð, þar sem taflmenn eru bókstafir - þar sem K stendur fyrir konunginn og svo framvegis er hönnun snillinga hjá Hat Trick Design.
• Ragnheiður Tryggvadóttir vöruhönnuður hefur vakið athygli fyrir frumlega hönnun en hún sýndi á nýliðnum Hönnunarmars línu eldhúsáhalda úr birkikrossvið, tágum og sísalsnæri. Ragnheiður vinnur nú að frekari útfærslu áhaldanna og framleiðslu þeirra hér á landi og er von á þeim á markað áður en langt um líður. 
• Nodknot eru púðar sem Ragnheiður Ösp Sigurðardóttir vöruhönnuður á heiðurinn af en form púðanna þykir einstakt og hefur vakið mikla eftirtekt en þá eru þeir í afar skemmtilegum litum. Hönnunartímarit um allan heim hafa undanfarið birt myndir af púðunum.
• 100 ár fæðingarafmælis danska hönnuðarins Finns Juhl var minnst í ár. Finn Juhl var menntaður í húsagerðarlist en einbeitti sér þó fyrst og fremst að húsgögnum. Juhl, ásamt Arne Jacobsen, Poul Kjærholm og fleirum, er sagður hafa mótað þá stefnu sem nefnist Danish Modern.
• Hausttískan í ár einkenndist af risastórum ljósakrónum, spænskum áhrifum og „verksmiðjulegu útliti“ heimila.
• Dottir & Sonur héldu áfram að gera góða hluti en á heimasíðu H&M í sumar sást að ljós frá þeim var þar notað í stílíseringu. Dottir & Sonur er hönnunarfyrirtæki í eigu Íslendinganna og hjónanna Tinnu Pétursdóttur og Ingva Guðmundssonar. Vorið 2012 í heimilistískunni var skemmtileg blanda af dökkum við og ljósum við, gulli og sjötta áratugnum.

• Textílhönnuðurinn Bryndís Bolladóttir og grafíski hönnuðurinn Anna Margrét Sigurðardóttir hugsuðu um jafnrétti og vinskap þegar þær hönnuðu veggfóður og prentlistaverk þar sem svanurinn nýtur sín í allri sinni dýrð.

• IKEA PS, lína af hönnunarvörum, vakti athygli í ár sem endranær en hún kemur út á nokkurra ára fresti. Hönnuðir IKEA PS 2012 voru beðnir að sækja sér innblástur í 60 ára sögu IKEA og tókst frábærlega til með verkefnið.