Tilraunaverkefninu „BÚKOLLA“ var ýtt úr vör fyrir fimm árum í kjölfar aukinnar áherslu á græna, náttúrlega nálgun í tengslum við matvæli, vörur og framleiðslu. Hugmyndin fellur vel að þeirri nytjahreyfingu sem hefur vaxið fiskur um hrygg á síðustu árum. Hönnunin er einstök fyrir þær sakir að unnið er með hráefni sem hingað til hefur verið fargað. Til að þróa vöruna enn frekar er unnið að því að finna leiðir til að auka gæði í útfærslu vörunnar, með áherslu á íslenskt handverk. Grunntónninn er vistvæn framleiðsla þar sem sérhvert verk er einstakt.