Heimilin gerast ekki mikið fallegri en þessi 168 fm íbúð við Skaftahlíð sem er í húsi sem byggt var 1947.
Búið er að endurnýja gamlar innréttingar á einstaklega heillandi hátt. Í eldhúsinu er til dæmis hvít sprautulökkuð innrétting með innfelldum höldum. Veggurinn fyrir ofan er flísalagður með flísum í stærðinni 10x10. Flísarnar eru í svokölluðum sundlaugarlit sem spilar vel við gula sófann í eldhúsinu og PH-ljósið. Það er hrein unun að horfa á það hvernig hver hlutur er settur á sinn stað á áreynslulausan og heillandi hátt.
Gangurinn í íbúðinni er kafli út af fyrir sig. Þar er efsti hlutinn málaður gulur sem er líka lýstur fallega upp með ljósum sem lýsa í átt að loftinu. Þetta er svolítið eins og að vera kominn í leikhús eða eitthvað álíka.
Svo kemur að borðstofu og stofu en þessi samliggjandi rými eru þrungin fegurð. Listaverk eftir Tryggva Ólafsson, Eames-stólar og Hay-pappaljós búa til einstaka heild. Í stofunni má svo sjá gamlan bólstraðan sófa sem fékkst í Epal á sokkabandsárum þess fyrirtækis.
Ef þig langar að bjóða augunum þínum í ævintýraferð skaltu skoða hverja einustu mynd og njóta.