Eik Gísladóttir grafískur hönnuður og frístundamálari hefur sett heillandi raðhús sitt við Sæviðarsund á sölu. Eik lagði hjarta sitt og sál í húsið þegar hún gerði það upp. Húsið er 232 fm að stærð og var byggt 1967.
Eik setti húsið í nútímalegt form með því að skipta um innréttingar og gólfefni. Búa til hjónasvítu og setja saunu í garðinn.
Þegar Eik festi kaup á húsinu var búið að endurnýja eldhúsið en það er hannað af Rut Káradóttur og voru innréttingar sérsmíðaðar hjá Smíðaþjónustunni.
Eik er þekkt smekkkona. Hún bjó lengi í Bretlandi þar sem fyrrverandi eiginmaður hennar var atvinnumaður í fótbolta. Hún hefur unun af því að gera fallegt í kringum sig eins og sést á raðhúsinu við Sæviðarsund. Ný ævintýri eru handan við hornið og því er húsið komið á sölu.