Barnafataverslunareigandinn Alexandra Helga Ívarsdóttir og fótboltamaðurinn Gylfi Þór Sigurðsson festu kaup á glæsilegu einbýlishúsi við Brúnás í Garðabæ á dögunum. Hjónin greiddu 367.000.000 krónur fyrir fasteignina. Ef hægt er að lesa eitthvað í verðið á húsinu þá virðist ennþá vera töluverð þensla á fasteignamarkaði.

Húsið er skráð 409 fm að stærð og miðað við kaupverð þá hafa Alexandra og Gylfi Þór greitt rúmlega 897 þúsund fyrir fermetrann sem þykir hátt verð fyrir sérbýli. 

Einbýlishúsið var hannað er af Sig­urði Hall­gríms­syni arki­tekt. Innanhússarkitektinn Guðbjörg Magnúsdóttir hannaði húsið að innan. Smekklegheitin eru allsráðandi í húsinu sem hefur að geyma það sem margir þrá. Eins og til dæmis stóra glugga, sérsmíðaðar innréttingar, glerhandrið, heimarækt og hjónaherbergi með risastóru fataherbergi. 

Alexandra og Gylfi Þór keyptu húsið af Lilju Aðal­steins­dótt­ur lög­fræðingi og Þór Hauks­syni fjár­festi sem höfðu fest kaup á húsinu 2019 og greitt fyrir það 160.000.000 kr. Lilja og Þór fóru í töluverðar endurbætur á húsinu og létu til dæmis mála það í dökkgráum lit að utan og sérsmíða bókahillur sem prýða stofuna. Í raun er ekki hægt að þekkja húsið sem sömu fasteign.