Fjölmiðlamaðurinn Snorri Másson hefur sett íbúð sína við Aðalstræti í miðbæ Reykjavíkur á sölu. Eignin telur 53 fm og er á þriðju hæð í fjölbýlishúsi sem reist var árið 1970. 

Árið 2023 var sannarlega viðburðarríkt í lífi Snorra, en hann eignaðist sitt fyrsta barn, soninn Má, með sambýliskonu sinni Nadine Guðrúnu Yag­hi. Í september setti hann svo á laggirnar nýjan fjölmiðil, Ritstjóra.

Gólfsíðir gluggar sem heilla

Eldhús og stofa eru samliggjandi í opnu alrými. Í stofunni er stór gólfsíður gluggi sem gefur rýminu án efa mikinn sjarma ásamt því að hleypa góðri birtu inn. Á milli stofu og eldhússins hefur borðstofuborði verið komið fyrir sem brýtur rýmið upp.

Eitt svefnherbergi og eitt baðherbergi eru í íbúðinni, en í svefnherberginu má einnig sjá gólfsíðan glugga sem gerir mikið fyrir rýmið. Frá herberginu er útgengt á svalir til suðurs. Ásett verð er 49,9 milljónir. 

Sjá á fasteignavef mbl.is: Aðalstræti 9