Við Mýrargötu í Reykjavík er að finna 66 fm endaíbúð á fyrstu hæð í fjölbýlishúsi sem reist var árið 2014. Ljósir og mjúkir litir eru í forgrunni í íbúðinni sem er með gólfsíðum gluggum og guðdómlegu eldhúsi sem fangar augað.
Eldhús, stofa og borðstofa eru samliggjandi í björtu alrými. Eldhúsið er nýlega uppgert með stílhreinni hvítri innréttingu og glæsilegum ítölskum marmara á eldhúseyju og eldhúsvegg.
Gott skápa- og vinnupláss er í rýminu, en marmarinn gefur því án efa mikið lúxusyfirbragð og setur punktinn yfir i-ið ásamt sjarmerandi innbyggðri lýsingu í eldhúshillum. Þá má sjá tvöfaldan postulínsvask og falleg gyllt blöndunartæki frá Lusso sem eru í stíl við höldurnar á innréttingunni.
Sami lúxusfílingur teygir sig einnig inn á baðherbergið sem er flísalagt með marmaraflísum á gólfi og veggjum. Hvít innrétting prýðir rýmið ásamt stílhreinum gylltum blöndunartækjum frá Lusso.
Í stofu eru gólfsíðir gluggar og stór rennihurð út á svalir þar sem sjarmerandi aðstöðu hefur verið komið fyrir. Ásett verð er 69.900.000 krónur.