Leikarinn og tökumaðurinn Baltasar Breki Samper hefur sett fallega íbúð sína á besta stað í Vesturbæ Reykjavíkur á sölu. Íbúðin sem er staðsett á Melhaga er 75 fermetrar og er ásett verð 59,9 milljónir.
Íbúðin er afskaplega notaleg en Baltasar Breki hefur komið sér vel fyrir í íbúðinni ásamt unnustu sinni, Önnu Katrínu Einarsdóttur sviðslistakonu, og dóttur þeirra.
Parið er greinilega óhrætt við liti og á hvert rými sinn lit. Í stofunni er rauðkalkmálning á veggjum, í svefnherberginu er veggirnir málaðir með grænni kalkmálningu. Gangurinn er síðan málaður með grárri kalkmálningu en kalkmálningin gefur heimilinu einstakan blæ.