Smartland Mörtu Maríu | Heimili og hönnun | mbl | 20.6.2024 | 16:19

Ný stjórnarkona í Sýn selur lúxushöll í Garðabæ

Viðskiptakonan Petrea Ingileif Guðmundsdóttir hefur sett einstakt einbýlishús sitt í Akrahverfinu í Garðabæ á sölu. Petrea hefur komið víða við í íslensku viðskiptalífi og var um tíma forstjóri símafyrirtækisins Tal. Hún kom ný inn í stjórn Sýnar í vor þegar ný stjórn var kosin.

Sigurður Hallgrímsson arkitekt hjá Arkþingi teiknaði húsið og Rut Káradóttir innanhússarkitekt hannaði húsið að innan. Fjallað var ítarlega um innanhússhönnun hússins í bók Rutar Káradóttur Inni sem kom út 2015. Húsið er 361 fm að stærð og var það reist 2011.

Dökkar súkkulaðibrúnar innréttingar prýða eldhúsið og er dökkur steinn á borðplötum. Í eldhúsinu eru tveir bakaraofnar og vínkælir svo eitthvað sé nefnt. Eldhúsið er sérhannað fyrir veisluglaða matgæðinga sem elska að elda og baka á sama tíma. Í eldhúsinu er stór og myndarleg gaseldavél.

Fyrir framan eyjuna eru sófar sem er svolítið öðruvísi en gengur og gerist.

Í húsinu eru sjö svefnherbergi og fjögur baðherbergi. Gólfin eru flotuð og mikið lagt í hönnun hljóðvistar með niðurteknum loftum og falinni lýsingu. Eins og sjá má á fasteignavef mbl.is þá er mikið lagt í húsið og ekkert til sparað.

Sjá nánar á fasteignavef mbl.is: Góðakur 8