Smartland Mörtu Maríu | Heimili og hönnun | mbl | 23.7.2024 | 6:00

190 milljóna sumarhús við Þingvallavatn

Ásett verð er 190.000.000 krónur. Samsett mynd

Á fallegum útsýnisstað við Þingvallavatn stendur 267 fm sumarhús sem reist var árið 2013. Húsið stendur á 5.900 fm eignarlóð og hefur verið innréttað á sjarmerandi máta, en það var Rut Káradóttir innanhússarkitekt sem sá um hönnunina.

Þegar kemur að efnisvali hefur greinilega verið vandað til verka, en í húsinu má sjá heillandi efnivið og áferð sem setja svip sinn á rýmið. Þar á meðal má nefna flottan við í sérsmíðuðum innréttingum og íslenskt stuðlaberg sem prýðir bæði gólf og arin.

Eldhús og borðstofa eru í björtu og rúmgóðu alrými með einstöku útsýni yfir Þingvallavatn. Eldhúsinnréttingin er með sérlega góðu vinnu- og skápaplássi ásamt stórri eyju, en frá borðstofu er útgengt út á verönd.

Sumarhúsið stendur á fallegum útsýnisstað við Þingvallavatn. Ljósmynd/Af fasteignavef mbl.is

Eldhúsið er bjart og rúmgott. Ljósmynd/Af fasteignavef mbl.is

Fallegur efniviður sem skapar hlýlega stemningu

Í stofunni er einnig fallegt útsýni yfir vatnið og til fjalla en þar má sjá glæsilegan arin úr stuðlabergi og þaðan er einnig útgengt á verönd. Mikill sjarmi er yfir húsinu og þó það sé nútímalegt þá gefur hlýlegur viðurinn í loftum, hurðum og innréttingum eigninni notalega sumarhúsastemningu.

Alls eru þrjú svefnherbergi og eitt baðherbergi í húsinu. Ásett verð er 190.000.000 krónur.

Sjá á fasteignavef mbl.is: Skálabrekkugata